MR Vaccination 97% tihlawhtling tawh

India ram hmun dang ang bawka Mizoram puma Measles Rubella (MR) Vaccination Campaign kalpui dan chu, May 25, 2017 khan Health & Family Welfare department hnuaia Immunisation Section Principal Director office-ah thlirlet a ni a; MR Vaccination Campaign hi Mizoramah 97% tihhlawhtlin a nih tawh thu tarlan a ni.

Meeting chairman Dr F Lallianhlira, Health principal director chuan, an thawhpui department - School Education leh Social Welfare department-te chungah lawmthu a sawi a, "MR Vaccination Campaign hi a hun takah ṭan lo mah ila, School Education leh Social Welfare department-te leh, a bikin ICDS-te nen kan thawhhona leh ṭanrualna a ṭhat em avangin hlawhtlinna duhawm tak kan hmu thei a ni," a ti.

Dr F Lallianhlira chuan, MR Vaccination Campaign-a target, 100% chu la thleng chiah lo mah se, 97% tihhlawhtlin a nih tawh avangin lawmawm a tih thu a sawi a; an la kal zelna turah lungrual tak leh taima taka thawk turin mawhphurhna neitute a chah.

World Health Organisation hnuaia surveilance medical officer Dr Lalhlimpuii chuan, MR Vaccination chungchanga May 22, 2018-a Rapid Convenience Monitoring neihah Mizoramin MR Vaccination hi 97% tihhlawhtlin a nih tawh thu a sawi a, "Campaign hman zawh a nih hmaa hetiang zat target kan thleng thei hi a lawmawm hle a ni," a ti.

Sorkar thuchhuah tarlan danin, MR Vaccination Campaign zawh hnuah pawh routine immunisation hnuaiah MR vaccine hi telh tawh tur a ni a, MR vaccine chu lak chhunzawm zel tur niin, dam chhungin vawi hnih lak tur a ni. First dose chu naupang thla 9 an tlin hunah lak tur a ni a, second dose chu thla 16 a tlin hunah lak chhunzawm tur a ni.

Health depatment chuan, MR vaccine mai bakah, hri danna lak ṭhinte chu ngai pawimawh a, naupangte a bikima vaccine laktir ngei turin mipui an ngen a ni.