MIMER-a MBBS fee zat tur bithliah

Mizoram Institute of Medical Education and Research (MIMER)-a MBBS zir man, fee bithliahtu - Committee for Fee Fixation chu an chairman Justice T Vaiphei hoin May 26, 2018 khan Aijal Club-ah an ṭhukhawm a; MIMER-a MBBS zir man tur an bithliah fel.

Committee for Fee Fixation hi Medical Council of India-in a phût anga din a ni a, May 21, 2018 khan Mizoram sorkarin a dinna order a tichhuak. Committee-ah hian High Court judge hluite chairman tura tih a ni angin, chairman atan Justice T Vaiphei ruat a ni.

Meeting-ah hian Justice T Vaiphei chuan, Mizoram sorkarin rang taka Committee a din chu lawmawm a tih thu sawiin, MIMER-a MBBS zir man bithliah chu felfai leh uluk taka thil tih ngai a nih avangin, member-te chu zau taka an ngaihdante sawi turin a sawm a ni.

MIMER registrar Dr Jane Ralte chuan ṭhenawm state-a medical college leh ram chhung hmun danga medical college-te fee zatte leh state ṭhenkhata non-resident Indian (NRI)-te fee structure zir chianna a neih chu Committee hmaah a pharh a, chipchhiar taka sawiho a ni. Committee chuan, MIMER hmasawn zelna tur leh Mizoram dinhmun ngaihtuah chungin MIMER-a MBBS course fee chu an bithliah fel a; mahse, Cabinet-in a pawmpui a la ngai dawn niin an sawi.

MIMER hotute chuan, medical college din turin tih tur tam tak a la awm tih an sawi a, "Medical Council of India lamin tih ngei tur leh phût tam tak a neih avangin tih tur tam tak kan la nei a, hmalakna tur a la tam a, theihtawpin hmalak zel a ni," an ti.