MPCB-in lemziaka inelna an buatsaih
Mizoram Pollution Control Board (MPCB) chuan May 26, Inrinni khan kumina World Environment Day pualin Govt. Aizawl College-ah 'Plastic pollution' tih thupui hmangin On The Spot Painting Competition an buatsaih a; Aizawla sikul hrang hranga Eco Club member-te tâna buatsaih niin, sikul 22 aṭangin zirlai 88 an tel.
Intihsiakna hi category pahnihah ṭhen a ni a; category I-ah primary school leh middle school zirlaite awmin, zirlai 27 an tel a, category II-ah high school leh higher secondary school-te awmin, zirlai 61 an tel a ni. Lawmmante chu June 5-a World Environment Day hmanaah sem a ni ang.
MPCB chuan Mizoram chhûnga Eco Club member-te tân Crafting Competition a buatsaih mêk bawk a; zirlaite'n plastic hman hlui aṭanga an thil siamte chu MPCB office-ah May 30 thleng thehluh theih niin, lawmmante chu World Environment Day hmannaah vek sem tur a ni.
Kumina World Environment Day thupui chu 'Beat plastic pollution' tih a ni a; MPCB chuan, plastic lam chi reng reng hi a tlêm thei ang ber hmang turin mipui an ngen a ni.