Governor-in Mizoram a chhuahsan ; Vawiinah Governor thar lak luh a ni dawn

Governor Lt. Gen. Nirbhay Sharma chuan a term a tâwp tâk avangin nimin khan Mizoram a chhuahsan a; a term ṭha taka a hman zawh avanga a lawmthu a sawi. Governor thar tur Kummanam Rajasekharan chu vawiin chawhma dar 11 hian Raj Bhavan-ah lak luh tum a ni.

Raj Bhavan a chhuahsan hmaa Banquet Hall-a chief minister Lal Thanhawla leh minister dangte nena an inkawmnaah Lt. Gen. Nirbhay Sharma chuan, Mizoram Governor hna a chelh chhungin Council of Minister leh sorkar official-te'n an ṭawi­awmaah lawmthu a sawi a, "State tana ṭha turin Constitution hnuaiah theihtawp ka chhuah ve a ni. Chief Minister-in theih­tawpin min pui a, ka lawm hle," a ti.

Lt. Gen. Nirbhay Sharma chuan, Mizo­rama a awm chhungin thil tam tak a zir thar thu sawiin, "Min thlaktu tur Kummanam Rajasekharan hi duhsakna ka hlan a ni," a ti a; amah thlaktu tur nen ṭha taka minister leh official-te an thawhho theih ngei a beisei thu a sawi.

Governor kal chhuak ta chuan, Mizorama a rawn kal tirh aṭangin a nupui nen Aizawl chu a ngainat nghal thu sawiin, "Governor ka nih chhunga ka hun hman dante ka thlirlet a, ka lungawi a ni. He lai hi mahni ram ang maiin kan ngaina a, Mizote’n hmangaihna leh ngainatnaa min vûr pawh kan phak ang tâwka rulh let kan tum ṭhin. A nihna takah chuan Mizoram zûnah kan uai a ni," a ti.

Mizorama a chàm chhungin ṭhalai ṭha­hnem tak a kawm thu sawiin Nirbhay Sharma chuan, "Mizoram tihmasawn turin anmahniah thathona leh rualelna ka hmu thei. Kan state hian sorkar laipui aṭangin ngaihven a hlawh sâwt hle. Hmarchhak bial hian ngaih pawimawh a hlawh tawh a ni," a ti a; tun aṭanga hun rei loteah dinhmun sang takah Mizoram chu a invawrh tur thu a sawi.

Lt.Gen. Nirbhay Sharma chuan, Mizo mipuite ziak leh chhiar thiamna chu eizawnna tlaka siam turin education leh skill development kalphung ennawn chu an hmachhawp pakhat a nih thu sawiin, "Tunah ziak leh chhiarah 91.33% vel ni mah ila, eizawnna hmu chu 24% chauh an ni," a ti.

Governor kal chhuak ta chuan, mi tin huapzo hmasawnna leh nun dan hrisel a ngaih pawimawh thu sawiin, "Hemi lamah hian kohhran, khawtlang leh tlawmngai pawlte an pawimawh hle. Kum 20 chhung ram a buai lai khan kan state-ah remna leh muanna a awm theih nan nasa takin thâ an lo thawh tawh a ni," a ti a, kum 1986-a remna thuthlung anga hlawhtling hmarchhak biala remna thuthlung dang a awm loh thu a sawi.

Nirbhay Sharma chuan, autonomous district council pathumte zingah a bik takin CADC-in a bik taka ngaihven a mamawh nia sawiin, "Ziak leh chhiar thiamah kan state chu chawhrualin 90% aia sang a nih lain, CADC chuan 50% pawh a tling pha lo. ADC-te inrêlbâwl danah dik tâwk lo a awm a, hei hian mawhphurhna latu tur a tichiang loin, a ṭul aia tam rorelna hmun a siam a ni. Tun aṭanga hun rei loteah mi dangte ṭhan ruala an ṭhan ve theih nan a felhlel laite siam ṭha turin hmalak zel a ni," a ti.

Lt.Gen. Nirbhay Sharma hi Raj Bhavan-ah chief minister Lal Thanhawla, speaker Hiphei, Home minister R Lalzirliana, minister dang pathum H Rohluna, Zodintluanga leh Lal Thanzara, deputy speaker R Lalrinawma, Chief Secretary leh DGP bakah, sorkar secretary eng emaw zatin an thlah a; Chief Minister leh minister dangte hian Ṭhuampui Helipad thleng an thlah a ni.

Lt.Gen. Nirbhay Sharma hi May 26, 2015 khan rinawmna thu tiamtirin Mizoram Governor atana lak luh a ni a, Mizoram Governor 18-na a ni. Amah thlak tur hian sorkar laipui chuan Kerela BJP president Kummanam Rajasekharan a ruat a, ani hi vawiin chawhma dar 11 hian Mizoram Governor atana lak luh tum a ni. Governor thar tur hian nimin khan Delhi Mizoram House a thleng a, vawiinah Mizoram a rawn pan dawn nia thu dawn a ni.