Mizoramah mi 17-in Kawasaki natna an vei tawh

Mizorama natna la hriat lâr loh tak, Kawasaki Disease an tih chu Mizo zingah vei an awm nual tawh a, a veite enkawlna pui ber, State Referral Hospital-ah chuan mi 17 enkawl ni tawhin, tunah hian mi pali enkawl mek an ni; thihpui erawh an la awm lo. State Referral Hospital hotute chuan, he natna avang hian chî-àina tur a awm loh thu an sawi.

Vanglaini palai zawh­na chhangin State Refe­rral Hospital hotute chuan, Ka­wasaki Disease hi Mizo­ramah chuan kum 2016 March/April thla velah hriat ṭan a nih thu an sawi a, "A hma pawhin a awm tho mai thei a, mahse, a hma lamah chuan kan la hre lo," an ti. Referral Hospital-ah hian Kawasaki Disease natna neite enkawltu ber chu Dr Elizabeth Lal­hmangaihzuali a ni.

State Referral Hospi­tal hotute sawi danin, Kawasaki Disease lan chhuah dan chu khawsik sang, ni nga chhung vel khawsik deuh reng te, taksaa vual leh sen deuh ṭuak awm te, hrawk ná te, thâwk lama harsatnate a ni tlangpui. Mihring leh mihringah inkai chhâwn theih loha ngaih a ni a, chutih rualin, kai lo turin inven vak ngaihna a awm lo niin an sawi.

Kawasaki Disease hi naupangin an kai deuh ber a, hei hi khawvel hmun dangah leh Mizoramah pawh a nih dan tlangpui a ni. Mizorama kai tawh ṭhenkhat chu tangseh an vei hnua kaite an ni. Doctor-te chuan, Kawasaki Disease thlentu ber chu virus leh bacteria-te a nih thu an sawi a, "Virus eng pawhin a thlen thei a, bacterial infection pawh a ni thei. Natna leh bawrhsâwmna nei sate'n an kai thei bawk," an ti.

State Referral Hospi­tal-a doctor-te chuan, Kawasaki Disease chu hmuh chhuah hma a ni a, damdawi pek nghal a nih chuan tihdam a harsa lo tih an sawi a, "Damdawi man erawh a to hle. A damdawi hi Mizoramah a awm lo a, Guwahati-ah mi kan chah ṭhin," an ti. A damdawi chu market-ah chuan Rs. 13,500 mante a ni a, Guwahati-a an laknate erawh chu State Referral Hospital-ah Rs. 8,500-in an pe ṭhin tih an sawi.

Doctor-te chuan, Ka­wa­saki Disease damdawi man a to avang­in mi pa­khatin a mamawh ang tâwka enkawl turin damdawi Rs. 20,000, Rs. 30,000 chuang mante a ngaih thu an sawi a, "Damlo rih zawng azirin damdawi pek ngai zat a danglam a. Kawasaki Disease hi natna hlauh­awm a ni hran lo a, a hlauhawm ber chu lunga thisen zám a khawih hman hi a ni a, hei hi damdawi pek hma chuan a vêng thei a ni," an ti.