Ni 3 chhungin chetsualnaah mi 8 an thi

May 26-28, Inrinni aṭanga nimin thleng khan, ni thum chhungin Mizoram hmun hrang hrangah chetsualna a thleng a, mi pariatin nunna an chan.

Nimin zing dar 8 vel khan Lengpui leh Hmunpui khaw inkara kawng hluia quarry-ah Kungliana (53) h/o Lalthangpuii, Lengpui chu lungin a delh hlum. Lengpui aṭanga thu dawn danin, Kungliana hian lung kar thlak a tum a, a lung kar thlak chu a awmna lamah a tla a, a insaseng hman loh avangin lung chuan a delh ta a ni.

Nimin chawhma dar 10:30 vel khan Zawlnuam Borai venga Borai luiah Lalruatsanga (16) s/o Lalmuanpuia, Zawlnuam Borai ruang chhar a ni. Zawlnuam Borai Branch YMA hruaitute hnen aṭanga thu dawn danin, Lalruatsanga, pawl 10 zirlai hi nimin zing dar 5:20 vel khan a piin an in bula Borai luiah khawl hmanga tui pump turin a tír a, tui pump a tumna lamah electric current-in a man nia rin a ni.

May 27, Pathianni tlai dar 4 vel khan Canteen Kuala Assam Rifles mandir bulah scooter leh truck an intái a, scooter-a chuang Laura Lalhmingsangi (14) d/o David VL Chhuanawma, Nursery Veng, Aizawl chu a hmunah a thi.

Pathianni tlai 5:30 vel khan Samuel Lalchhanhima (22) s/o Vanneibera, Bungkawn chu Tlawng lui Reiek kaiah a tla hlum. Samuel Lalchhanhima hi a thiante nen Reiek kâiah an léng khawthawng a, chesual palhin, Tlawng luiah a tla a; Pathianni zan dar 8 velah hmuh a ni.

Pathianni tlai dar 6:30 velkhan Kawnpuiah Nayak company truck kawng thlangah a tla a, a hmunah driver Lalbiakmawia (29) s/o Sum­neihbuma, Luimawi, Mamit district chu motor-in a delh hlum a, mi dang pakhat a hliam bawk.

Pathianni zan vek dar 8 vel khan Lalfakzuala (27) s/o Lalngilneia, Vairengte Venglai chu an in aṭangin a tla a, a tlaknaah a thi nghal.

May 26, Inrinni tlai dar 4 vel khan Lunglei Zotlanga 61 BSF camp bula scooter-a chetsualnaah Lallawmkima (29) s/o Biaksangpuia (L), Lunglei Electric Veng a thi. Thu dawn danin, Lallawmkima hi Lalruatkima khalh Aprillia scooter MZ-02 B-0833 hnungah a chuang a, parrapet railing suin BSF duty post lungah an intauh a ni. Lallawmkima hi damdawi-in panpui a nih laiin a thi a, Lalruatkima na takin a hliam bawk.

May 26, Inrinni zan dar 8 vel khan Sunhluchhip ram chhunga Tuirial lui, Awle lí an tihah Kennedy (36) a tlahlum nia thu dawn a ni bawk. Hemi chungchangah hian Sunhluchhip khawtlang hruaitute biakpawh mai theih a nih loh avangin thu chiang erawh hriat theih a ni lo.