Aizawl khawpuia tâwt tihziahawm nan kawng chhawng kan siam dawn - Zorama

MNF president Zo­ramthanga chuan nimin khan an party pisa, Mizo Hnam Runa inkhawmah thu sawiin, Mizorama kawng zawng zawngte chu damdawi-in ICU-a awm ang niin a sawi a, an sorkar hunah Aizawl khawpuiah lirthei tâwt tihziaawm nan kawng chhâwng siam an uar dawn thu a sawi bawk.

Tuna Mizoram din­hmun chu a chhe hle nia sawiin Zoramthanga chuan, "Mizoram kawng zawng zawngte pawh ICU-a awm ang a ni. Thingtlang khaw chengker pawh ni lo, Champhai khawpuiah meuh pawh thla nga hnuah pawh gas an hmu chhunzawm thei lo. Nationalism tihchhiat tumtu Congress sorkar hnuaiah kan rûm a, kan ṭap a ni," a ti.

Zoramthanga chuan, MNF chu a sorkar leh hunah chuan langtlang sorkar a ni tawh dawn tih sawiin, "Langtlang sorkarah chuan corruption pawh automatic-in a insáwr zím tawlh tawlh dawn a, tih hleih theih lohin a awm thuai dawn," a ti. Decentralisation of power an kalpui dawn thu te, Aizawla lirthei tâwt siamfel nan kawng chhâwng (elevated road) siam vek an tum thu te, khawpui laili aṭangin Assam Rifles insawn chhuak ngei tura hma an lak dawn thute a sawi bawk.

MNF President chuan, Mizoramah Pathian remruat a la thleng fam­kim thei rih lo a, an duh záwng an la thlentir thei rih lo tih sawiin, "A nih tur ang tak a la nih loh avangin thil thleng tur leh nih dan tur a la thleng famkim thei rih lo. Mizoram hi îtawm ngawih ngawih tura kan siam a ngai a, Mizote tana kan Jerusalem chu Mizoram hi a ni," a ti a; chutiang tur chuan Mizoram mipuite hnam thinlungah an harh chhuah a ngaih thu a sawi.

Hnam thinlunga Mizote an harh theih loh chhan chu hnam thinlung dodaltu Congress an la len vang nia sawiin Zorama chuan, "Tun thlengin an la sorkar bawk si a. Hnam thinlung dodaltu hi a chhiat phawt a ngai a, India ram pumah an zawmpui an tlachhe chho zel a, Mizoramah pawh Congress sorkar a tlachhe mek. Tunah chuan hnam thinlungah kan harh tawh dawn a ni," a ti.

MNF President chuan, Mizoram chu ram páwna Mizo awmte tan îtawma an siam phawt a ngai nia sawiin, "Kum 10 kan sorkar chhung khan thil tam tak tih dik tâwk loh kan nei. Mipui ngaihzàwn záwngin kan awm thiam lo a, an duh dan tihhlawhtlin loh tam tak kan nei," a ti a; an sorkar lai leh tuna an dinhmun chu naupang leh puitling ang a nih thu a sawi.