KHAWTHLIR

Thisen pe
Keifang Joint YMA chuan nimin khan an khuaah Aizawl Civil Hospital tan thisen unit 118 an pe a, a petute mipa 93 leh hmeichhia 25 an ni. May 26, Inrinni khan TKP Coordination bultumin Republic Bial leh Republic Vengthlang bial ṬKP ten Aizawl Civil Hospital tan thisen unit 75 an pe a, a petute mipa 66 leh hmeichhia pakua an ni. Jubili Branch KṬP member mipa 23 leh hmeichhia pariatte'n Synod Hospital tan thisen unit 31 an pe bawk.

MGDA lawm
Mizoram Gas Distributor Association (MGDA) chuan thuchhuah siamin, eirawngbawlna gas-a harsatna an tawh chungchangah Food, Civil Supply & Consumer Affairs (FCSCA) minister John Rotluangliana'n a sutkiansak niin an hria a, an lawm thu an tarlang. MGDA tarlan danin, May 1-14, 2014 chhung khan Aizawlah gas cylinder 16,470 a thleng a, FCSCA Minister hmalak hnuah May 15-25, 2018 chhungin Aizawlah gas cylinder 32,958 a thleng a ni.

Cabinet thulh
Nimin khan Cabinet Meeting hun atana ruat a ni a, mahse, Governor kal chhuak tur Lt.Gen. Nirbhay Sharma-a'n Mizoram a chhuahsan hun a nih avang leh Governor thar tur Kummanam Rajeskharan lak luhna tur thil vel avangin ṭhulh a ni. Finance minister Lalsawta chuan, Cabinet Meeting hmasa berah 7th. Pay zirchiangtute'n report an thehluh sawiho a nih tur thu Vanglaini a lo hrilh tawh a ni.

ECI dàwr dawn
NGO Coordination Committee hruaitute chuan an thurel bawhzuiin, nimin khan kumin MLA inthlanah Tripura Refugee Camp-a Bru-te an camp-a vote thlaktir lo tura Election Commission of India (ECI) ngen turin New Delhi an pan. Joint NGO aiawh hian Central YMA president Vanlalruata, MHIP finance secretary Dr Thanpuii, MZP president L Ramdinliana Renthlei leh MSU president RB Lalmalsawma te an kal a; ruahman dan chuan vawiin chawhma dar 11:30-ah ECI hotute nen an inkâwm ang.