Topper-te hnenah CM Award sem
Kumina HSLC leh HSSLC result chhuaka topper-te hnenah nimin khan Lal Thanhawla auditorium-ah Chief Minister's Award hlan a ni a, chief minister Lal Thanhawla'n a hman pui.
CM Award sem inkhawm hi Education secretary Esther Lalruatkimi'n kaihruaiin, Chief Minister chuan zirna lama hmasawnna chuan ram hmasawnna a thlen thu sawiin, "Zirna lamah hian sorkar pawhin nasa taka hma a la a ni. Ram dang el pha ‘export-quality education’ siam tura kawng hrang hranga hma lak a ni a, zirna siamṭha turin zirna lama India mithiam ber berte telna Education Reforms Committee din a nih tawh," a ti.
Lal Thanhawla chuan zirlaite chu nu leh pa thu awih a, chhunglam leh pawnlam nun uluk a, aia upate leh zirtirtute zah thiam tura fuihin, "Chutiang taka in nun chuan ram leh hnam innghahna tlak dik tak in ni ang. Tum ruh a ṭul a, tum tih san chuan tlakna pawh a sang tih vawng reng chungin, rilru tipaukhauh a, tum mumal tak nei chunga hmalam pan a pawimawh," a ti a, zirna chu ram leh hnam humhalhna atana thil pawimawh a nih thu a sawi.
Thusawitu dang Education minister H Rohluna chuan zirlai tiṭhate chu chawimawi an phu avangin leh an zirlai puite tan chona a nih theih nan Chief Minister’s Award chu sem ṭhin a nih thu sawiin, "Kumdang zawng aia kumin chu pass percentage a ṭhat ber tum a ni hi a lawmawm hle. Kum 2015-a selection test neih ṭhin chu naupangte tan an future career tichhetu a nih theih dawn avang leh sikul tihming-
ṭhat tumna chauh a nih avanga tih tawp a nih hnu khan result a chiat phah rinawm viau a mah se, pass percentage a ṭhat phah zel zawk," a ti.
Chawimawina dawngtute hi HSLC Topper pahnih, Lalremsiama Darchhun, St. Paul’s HSS leh Royal Philem, Mount Carmel School bakah HSSLC-a arts topper C Vanlalremruati, Home Mission School; commerce topper K Lalthansanga, St. Jospeh HSS; science topper Angela Vanlalhmangaihi, St. Paul’s HSS leh Nafisa Barlaskar St. Paul’s HSS leh vocational stream topper Lalhriatkimi, Govt. Mamawii HSS te an ni. An vai hian citation leh Rs. 50,000 ṭheuh pek an ni.