Keini aiin mipui an hmanhmawh tawh - Vanlalhlana

'Ṭangrual pawl, Zoram Peoples' Movement (ZPM) a- tel MPC party vice president Vanlalhlana chuan, ram ṭhatna duh pawl hrang hrang lungrual taka an awm khawm chu Mizo zia nia a hriat thu a sawi a, "Duh thuhmun leh duh loh thuhmun kan nih avangin mipuiin lawm takin min dawngsawng a, keimahni ai mah hian mipui an hmanhmawh tawh zawkin a lang," a ti.

Vanlalhlana chuan nimina ZPM chhung inkhawmah thu sawiin, "ZPM chief minister candidate hian CM hmingṭha, Super CM tia kan sawiho ang neih kan tum a ni," a ti a; Naveen Panaik, Manik Sarkar, Pawan Chamling, Natish Kumar leh Narendra Modi te'n an state hmasawnna an thlen avangin super CM tih an nih laiin, Madu Koda, Shibu Soren, M Karunadhi, J Jayalalitha leh Laloo Parsad Yadav te erawh chu an hmingchhe hle tih a sawi.

Mizoram chu ei leh bara a intodelh a ṭul thu sawiin Vanlalhlana chuan, kut hnathawktute an khai chhuak dawn a, tui leh kawlphetha lam mamawhna a sang tawlh tawlhte chu en liam mai a har thu a sawi a, "Pu Hawla leh Pu Zorama hian ram hmasawnna atan hna an thawk duh tak tak lo a, an hun remchang neih pawh an hmang ṭangkai thiam lo. ZPM kan sorkar chuan an tih duh loh ṭha zawng zawng hi kan ti vek ang," a ti.