Kawlphetha chungchang zirna buatsaih

Joint Electricity Regulatory Commission (JERC) for Mizoram & Manipur leh Power & Electricity department ṭangkawp chuan nimin khan Kolasib-a Synod Conference Centre-ah kawlphetha leh a kaihhnawih zau zawka mipuite'n an hriat theihna atana inzirtirna hun an buatsaih a, Kolasib DC Dr Arun T-in a hmanpui.

Dr. Arun T chuan, electric bill pek chungchangah mipuite'n nasa takin hun an khawhral ṭhin thu sawiin, "Ni sensa hnuaiah hun rei tak tak an intlar ṭhin a, hei hi mipuite tan phurrit a tling," a ti a; state dang tam takin kum 20 kal taa an tih ṭan tawh internet hmanga bill pek (online payment of bill) dan kawng zawng turin thuneitute a chah.

Kolasib DC chuan, khawpui chhunga electric hrui hnawk nuaia inzamte chuan khawpui a tiṭawpin a timawi lo tih sawiin, "Mipui tan pawh a him lo a, chhiatna a thlen thei a ni. Heng hrui hnawkte hi thenfai dan kawng zawn a ngai," a ti.

JERC chief engineer Lalchharliana Pachuau chuan, JERC thil tumte tarlangin, Electricity Supply Code leh mipui (consumer)-te'n harsatna an tawh thulha an zualkona tur a sawifiah a, "JERC thil tum ber chu mipuiin electric ṭha taka an hmuh theih nan, an hman dan mil leh phu tawka bill an chawi theih nan, a hun taka bill an hmuh theih nan leh harsatna leh buaina an tawh chánga chinfelpui a ni," a ti.

He hunah hian Kolasib V/C hruaitu te, YMA, MHIP leh MUP hruaitute an tel a ni.