Village task force an duty ngawrh Local/village task force-te sum pe lo

Khawvel ram hrang hrang leh India ram state tam zawka léng mek novel coronavirus (Covid-19) laka inven nan Mizoram sorkarin hma a la mek a, khua leh veng hrang hrangah village/local task force-te duty-in, chak takin hma an la mek. Hetih lai hian, local/village task force-te hi sorkar aṭangin an mamawha hman tur sum ruahman leh pek a awm lo.

Prime minister Narendra Modi rawtna anga India ram puma March 22, Pathiannia Janata Curfew kalpui Mizo­ramah a hlawhtling hle a, a hlawhtlin theih nan local level task force-te an thawh hlâwk hle. State level task force-in chawlhkar khat chhung lock down an rawtna chu Cabinet-in a pawmpui hnuah, a kenkawh kawngah local level task force-te'n ṭha takin an bawhzui nghal bawk.

Lockdown hi mipuiin ṭha taka an zawm theih nan local/village task force-te'n an bawhzui a, an khua/veng ṭheuhah kalpui dan tur an puangzar a ni. Chu mai bakah, mipui páwnchhuak turte vengin an huam chhung ṭheuhah lock down ṭan ní, nimin aṭang khan an duty leh nghal a ni.

Sorkar thuchhuakah chuan, lockdown chhung hian mipui ni tin mamawh zawrhna dawrte chauh hawn phal a ni a, dâwr dang zawng hawn phal a ni lo. Aizawla veng eng emaw zatah chuan nimin khan mipui ni tin mamawh zawrhna dawrte pawh hawn theih hun leh mipuiin an mamawhte leina hun siam a ni a; veng ṭhenkhatah chuan chawhma chhung emaw, chawhnu dar 2/3 vel thleng dawr hawn phal niin, a hnu lamah erawh chuan khâr tura tih a ni.

Thingtlang khaw tam takah village task force-te an khaw kawtchhuahah an duty a; khaw eng emaw zat chuan khaw danga mite chu an khuaah luh an phal tawh rih lo a, kawtchhuah kawngpuiah dái an theu hlawm. An khaw mite pawh khaw danga kal lo turin an inkhuahkhirh rih bawk.

Vanglaini palai zawhna chhángin Covid-19 donaa thawktu sorkar official-te chuan, local/village task force-te'n sum an mamawh a nih pawhin, tun dinhmunah chuan sorkar aṭangin pek tura ruahman a awm rih lo tih an sawi a ni.

Aizawla local task force lama hotu ṭhenkhat chuan, local task force angin sum mamawh tam tak awm lo mah se, sum hmanna tur erawh a awm ve neuh neuh thu an sawi a; sum tlem azawng tal, an mamawha hman tur sorkar aṭangin awm thei se chuan an tan thil lawmawm tak a nih tur thu Vanglaini palai an hrilh.

Hetih lai hian, MLA ṭhen­khat chuan anmahni sum leh MLA fund aṭang­in an bial chhunga task force-te ṭanpuina an pe a; Covid-19 laka inven nan mahni bial chhunga kut silna tur leh mamawh dang ruahmansak an awm bawk.