Tui bill online chauhin pek theih rih

Public Health Engineering (PHE) department changtu deputy chief minister Tawnluia hoin a pisaah nimin khan PHE department hotute an ṭhukhawm a; Covid-19 do nana hmalak dan tur chungchang an sawiho. Tui bill pekna hmunte chu khâr lailâwk a ni a, online-in pek theih reng a nih thu an sawi.

Deputy Chief Minister chuan, tui sem tikhaihlak loa mipuiin tui an dawn reng theihna tura ṭan la turin PHE hotute chu a hriattir a, "Chutih rual chuan, ṭhál a inṭan dawn chauh a, kan hma lam hunah eng nge kan tawn dawn tih a hriat loh avangin mi tinin tui a theih ang anga kan renchem a ngai a ni," a ti.

Meeting-ah hian Covid-19 vanga mipui vahvel khuahkhirhna (partial lock- down) kenkawh a nih hnuah Mizoram hmun hrang hranga tui supply dinhmun endikna aṭangin, tui hnianghnâr tâwk a awm thu te, mipui mamawhna avangin tui semtute leh pump-a thawkte chu châwl loin an thawk chhunzawm a, kutkawr leh hmai tuamna pek an nih thute an sawi.

PHE hotute sawi danin, tui bill chu online system - mobile phone app (Gpay, PhonePe) leh PHE department website billpay.phedmizoram.in kaltlangin pek theih a ni a, PHE bill pekna portal chu bill lehkhaah chiang taka tarlan vek a ni. Coronavirus avangin tui connection thar pek tur sanction awm sa, bawhzui lai mek eng emaw zat chu tihtawp lailâwk rih a ni a, remchang hmasa berah chhunzawm leh a ni ang.