Rangvamual kal tur vil uluk

March 22, Pathiannia zing dar 7 aṭanga zan dar 9 thleng India ram puma 'Mipui Curfew' kalpui a zawh hnu, zan dar 9 hnuah Rangvamual lam pan an tam hle nia sawi a ni a; hei vang hian nimin aṭang khan ngawrh zawka duty siam a ni.

Vanglaini palai zawhna chhangin Hunthar Veng Local Task Force hruaitute chuan, Pathianni zan khan dar 9 hnu lamah an veng paltlanga Rangvamual lam pan an tam thu an sawi a, "Tunah chuan police nen ṭangkawpin kan duty a, ṭul bik leh pawimawh bik tak ni loa kan veng aṭanga Rangvamual lam pan tumte chu kan kirtir zel tawh," an ti.

Rangvamual Local Task Force hruaitute pawhin Vanglaini palai zawhna chhangin, curfew zawhah an venga kal an awm nual thu an sawi a,  "Tunah chuan kan veng tawn tirhah duty kan insiam a, phalna lehkha nei lo chu kan kirtir zel a ni," an ti a; uluk taka duty an chhunzawm zel tur thu an sawi.