KHAWTHLIR

Home department chuan nimin khan thuchhuah siamin, Mizorama lut tur Assam-a lirthei tang­khang mek khalh­tute chu Mizoramah an him dawn a ni tih Mizoram sorkarin a tiam tih an tarlang. Truck-te chu Mizorama an luh hunah buaina an tawh loh tur thu te, anmahni leh an lirthei khalhte an him tur thute an tarlang a ni.

Serchhip Higher Secondary School NSS Unit chuan nimin khan Serchhip District Hospital-ah thisen unit 16 an pe a, a petute mipa 10 leh hmeichhia paruk an ni.

State Medical and Technical Entrance Examination (SMATEE) hnuaia first round-a seat pek tawhte chu November 9 aṭang khan HTE Technical Wing office, Chaltlang Lily Vengah spot document verification turin tihpui mek an ni a, naktuk chawhnu dar 2 thleng tih a ni ang.

MADC chhunga village council pariatah November 10, Thawhlehni khan by-election tluang taka neih a ni a, vote thlak zawhah vote tlate chhiar nghal niin, chhiar zawh a ni. By-election neihnate chu - Meisavaih East, Meisavaih West, Siaha New Colony-III, College Vaih-I, Siahatla-I, Ahmypi, Phura South leh Khopai-te a ni.

Central YMA chuan thuchhuah siamin, nimina National Education Day pual­in Mizo mipuite duh­sakna chibai an bûk tih a tarlang a, "He ní hian zirna kawnga inpekna thar nei a, ram leh hnamin hmasawnna kawnga ke a pên zel theihna atan ngaihtuahna thar séngin, YMA kumpuan 'Zirna uar' bawhzuina kawngah ṭan ila thar zel ang u," a ti.

Aizawl DC chuan November 10, Thawhlehni khan thupek chhuahin, Aizawl khawpui chhungah phalna nei loa vantlang hmuna mi panga aia tam awm khawm khap a nih thu a puang. Thupek hi hman nghal a ni a, November 30, 2020 thleng awh tur a ni.