Air India leh Indigo an thlawk mek Airport-ah ni tin mi 300 vel lut ṭhin

GAD Aviation Wing hotute hnen aṭanga thu dawn danin, tun dinhmunah Lengpui Airport-ah Air India leh Indigo Airlines-te thlawhtheihna an thlawk mek a, GoAir erawh chuan service an titawp lai­lâwk rih. Air India leh Indigo thlawhna hmangin Mizoram páwn aṭangin Lengpui Airport kaltlangin ni khatah khualzin mi 300 vel Mizoramah an rawn lut ṭhin.

Thlawhtheihna la thlawhtir zel chungchangah hian chief secretary Lalnunmawia Chua­u­ngo chuan, "Emergency thil atan a ṭangkai bakah, Mizo­rama lo haw turte tan an service a la ngai a ni," a ti a; chutih rualin, Lengpui Airport kaltlanga lut rêng rêng chu an khua/in pan ding nghal a, ni 14 chhung mahni ina inkhung hrang nghal tura tih an nih thu a sawi.

Lalnunmawia Chuaungo chuan, Mizoram páwn aṭanga rawn lutte chu kawng lakah teihawi, riah, chawlh khawmuan phal a ni lo tih sawiin, "Niléng zankhuain a ṭul chuan an tlân mai tur a ni. An kalna tur direct-a thlenna tur motor nei remchang lote chu an rawn luhna hmun azirin Lengpui emaw Vairengte emawa quarantine centre-ah dah an ni ang a, Aizawl leh hmun danga an chhungte leh ṭhiante bulah riah theih a ni lo. Direct-a an khua/veng thlenna tur motor an neih theih hunah chauh quarantine centre aṭanga chhuah an ni ang," a ti.

Chief Secretary chuan, India ram páwn aṭanga Mizoram luh tumte chu tunah chuan tum tawh lo tura thuràwn pek an ni tih sawiin, "An ticket neih sa pawh cancel mai tura thurâwn pek an ni," a ti a, an awmna hmun ṭheuhah inveng fimkhur turin a chah nghal a ni. Vanglaini palai zawhna chhangin Vairengte Police-te chuan state pawn aṭanga Mizorama rawn lut an awm tawh mang loh thu sawiin, "Mizoram mi state danga tangkhang tlem a zawng bak rawn lut an awm tawh lo. Nimin khan tlai dar 3 thlengin mi 52 an rawn lut a, chung zingah chuan 80% vel chu essential commodities phur an ni," a ti.