Bru-te Tripura-a vote thlaktir tum party an awm; Kan remti dawn lo - Central YMA

Central YMA chuan, Mizorama political pary zingah Tripura-a awm mek Bru, Mizorama vote neite'n an awmna hmuna vote an thlak theihna tura hma la leh ruahmanna siam an awm tih an hriat thu leh pawi an tih thu an tarlang a; Mizoram páwna vote thlak an remtih loh thu an puang nghal.

YMA Central Executive Committee chu nimin khan an ṭhukhawm a, October 30, 2021-a Tuirial Assembly constituency by-election neih tur an thlirho a; "Tripura-a anmahni duh thu ngeia tlân thla Tuikukte vote an thlak dawn a nih chuan, Mizorama an chuanna electoral roll awmna hmun ngeiah anmahni sensoin vote an thlak tur a ni," an ti.

CYMA chuan, "Tripura-a Tuikukte tana vote thlakna hranpa siam hi remchang loah kan ngai. Election Commission of India duh dan kalh a, therhlo nena Tuikukte vote thlak theihna tura ruahmanna siam political party an awm niin hriat a ni," an ti a, pawi an tih thu an tarlang.

Hemi chungchangah hian CYMA General Secretary chuan Vanglaini palai zawhna chhangin, Bru-te Mizoram páwna vote thlaktir lo turin Election Commission of India (ECI) an ngen tawh thu a sawi a, "Tunah hian ECI-in thu a la nei lo a, ECI pawhin thu a la neih loh laia he lai aṭanga Mizote ngeiin hma an lo la hi ṭha kan ti lo hle a ni," a ti.

General Secretary chuan, "YMA chuan Tripura-a an awmnaah emaw, Kanhmun vela vote thlaktir emaw pawh kan remti lo a, vote an neihna polling station ngeiah vote an thlak tur a ni," a ti a; "Mizorama vote an thlak tura an kalna atana pawisa lo zuk pe pawh an awm niin kan hria," tiin, hma latu political party erawh chu sawi chhuah a rem rih lo tih a sawi.

CYMA General Secretary chuan, hmalak a ṭul a nih chuan hmalak dan turah eng emaw chen an inruahman nghal thu sawiin, "CEC leh Sub-Hqrs YMA-te'n an ṭul angin hma kan la ang," a ti a; thil dang vangin zanin hian Aizawla YMA branch tin aiawhte an inko khawm dawn a, chutah chuan Bru vote thlak chungchang chu an sawi nghal a rinawm thu a sawi bawk.

Bru-te chungchanga CYMA thuchhuak
1) Mizo mipui leh political party-te hemi kawnga hma la lo turin YMA chuan a ngen tak meuh a ni.
2) Tuikukte sum pe zawng leh an kalna tur buaipuitute hi YMA chuan Mizo hnam pawi khawihtuah a ngai.
3) Tuirial Assembly by-election hi dik taka kalpui a nih theih nan, a ṭul a nih chuan YMA chuan Hortoki leh Zodin polling station-ah viltu ṭhahnem tak a ruat dawn a ni.