Skywalk leh ropeway siam tur Lokayukta/CBI chhuitir tum a ni

Tourism minister Robert Romawia Royte chuan, Sakawrhmuituai tlanga skywalk project leh Chaltlang leh Durtlang inkara ropeway siam turah sum tihchingpen a awm nia a lan thu sawiin, heng project pahnihte hi Lokayukta emaw Central Bureau of Investigation (CBI) emaw chhuitir dan tur ngaihtuah mek a nih thu a sawi.

Robert Romawia Royte hian October 23, Inrinni khan Lungdaia vantlang inkhawmah thu sawiin, "Lungdai ram chhung, Sakawr­hmuituai tlanga Skywalk Project chu Chal­tlang leh Durtlang inkara ropeway siam turah hna­thawh hmaa cheng nuai 1,200 chuang kum 2018 hma lama release tawh ni si, a taka sum hman mumal a awm loh avangin Ministry-in sum a rawn release duh tawh lo. Sakawrhmuituaia skywalk atan pawh cheng nuai 245 lai hnathawh hmuh tur awm mang si loin kum 2018 hma lamah release a ni," a ti.

Sakawrhmuituai tlanga Skywalk Project leh Chaltlang-Durtlang rope­way project-a con­trac­tor-te chu hna an thawh loh avangin an sum lak tawh kìr turin vawi duai lo Tourism department-in a hrilh tawh tih sawiin Robert Romawia chuan, "Mizoramah pawh a rawn zin duh tawh lo," a ti a; dan anga hmalak zel a nih thu a sawi.

Tourism Minister chuan, cheng nuai sang chuang chingpen nia a lan avangin Lokayukta emaw CBI emaw kuta pek mai an ngaihtuah mek tih a sawi a; chutih rualin, Sakawrhmuituai tlanga Tourism project chu ṭha taka kalpui zel tum a nih thu a sawi bawk.

Sakawrhmuituai tlanga skywalk siamna tur hi Development of Eco-Adventure Circuit Aizawl-Sakawrhmuituai Tlang project a ni a, April 3, 2018 khan khatih laia Tourism minister John Rotluangliana'n a lungphùm a phúm.

April 3, 2018-a sorkar thuchhuaha a lan danin, Development of Eco-Adventure Circuit Aizawl-Sakawrhmuituai Tlang atan hian Ministry of Tourism aṭangin Swadesh Darshan Scheme hnuaiah kum 2017-18 chhungin cheng nuai 9,907 hmuh a ni a; project thawk turin Leading Edge Pvt.Ltd rawih a ni.