AMC-in kum 2022 aṭangin SWMC enkawl an inbeisei

Aizawl khawpui bawlhhlawh sawngbawlna Solid Waste Mana­gement Centre (SWMC), Tuirial chu December 2021 thleng State Investment Program Management and Implementation Unit (SIPMIU)-in an enkawl dawn a, kum 2022 aṭangin Aizawl Municipal Corporation (AMC)-in an enkawl ṭan beisei a ni.

AMC executive councillor (i/c Solid Waste Management) Laltlanzova Khiangte chuan Vanglaini palai zawhna chhangin, Tuiriala SWMC chu AMC kutah a la awm vek loh thu a sawi a, "Tunah hian SIPMIU-in enkawlna tur sum an la neih avangin Mizoram sorkar chuan kumin December thla thleng operation & management chhunzawm turin a ti a, kum thar lam aṭang chuan AMC kutah a awm tawh a rinawm," a ti a; AMC kuta a awm hunah tih tak takna nen an enkawl dawn thu a sawi.

Aizawl khawpuia bawlhhlawh sawngbawlna chu an ngaih pawimawh ber a nih thu sawiin Laltlanzova chuan, "Covid-19 lèn lai a nih avangin mipui lam nawr vak kan tum rih lo a, mumal taka Aizawl khawpuia kan bawlhhlawh paihte sawngbawl a nih theihna tur lamah kan insáwrbing rih," a ti.

Executive Councillor chuan, "Tunah hian Aizawl Mayor hmalaknain Aizawl khawpuia veng 83 zinga veng 40-ah a hmun loa bawlhhlawh paih ṭhinnate hung (garbage fencing) turin hma kan la mek," a ti a; a hlawhtlin dan leh sum awm dan azirin veng dangah pawh tih chhunzawm a nih tur thu a sawi.

Laltlanzova Khiangte chuan, Mizoram sorkarin AMC hnenah bawlhhlawh sawngbawlna tur siamna atan sum a pek dawn thu sawiin, "Tuirial SWMC-a bawlhhlawh hâl ralna tur (incinerator) bun nan Rs 2,74,000 leh Aizawl chhim lam vengte tan Hualngohmuna waste centre dinna tur cheng nuai 166.4 min pek a tum. Heng atan hian sorkarin order a tichhuak tawh a, mahse, kan kutah pawisa a la lut lo," a ti. Luangmualah Aizawl khawpuia plastic bawlhhlawhte paihna hmun tur bik Plastic Processing Plant din an tum thu a sawi bawk.