Bawlhhlawh taka tlin ai chuan Thianghlim taka tlâk kan duh - ZPM Working President

ZPM chuan October 23, Inrinni khan Serkhan leh Bûkpui khuaah vantlang inkhawm an buatsaih a; ZPM working president K Sapdanga chuan thu sawiin, bawlhhlawh taka tlin ai chuan thianghlim taka tlâk an duh zawk thu a sawi.

K Sapdanga chuan, hlemhlêtnain vote kan zawng tur a ni em ni, tia zawhna siamin, "ZPM candidate hian i vote kha suma rawn lei a tum a nih chuan, lo vote loh phah ngam rawh. Chuti lo chuan he ramah hian rorelna ṭha a piang ngai lo ang. Páwl dang kan sawisak ngam lo, ZPM chhungah chuan ram rorelna ṭha din kan duh a, bawlhhlawh taka tlin ai chuan, thianghlim taka tlâk kan duh zawk," a ti.

ZPM Working President chuan, tun hnaiah mi ṭhenkhatin ZPM leh MPF inkarah hèm thlâk an tuma a lan thu sawiin, "MPF leh political party-te thawhhona thuthlung hi political party zawng zawngte'n kan sign vek a, ZPM party pawh hian zawm hram hrâm i tum ang u tih hi kan in zirtir dan a ni," a ti a; ZPM chuan MPF hmalakna fakawm an tih thu a sawi.

Tuirial bial chu ram leh hnam hmangaihtu dik tak awmna bial a nih thu sawiin K Sapdanga chuan, "Kum 2018 General Election khan party mumal taka kan indin hma, unit pawh nei mumal lo kan nih laia ZPM candidate lo thlang tlingtute kha in ni. Bial mipuite'n rilru fím tak hmanga vote in thlak vang a ni a, tun ṭumah pawh hian rilru fím taka vote thlak leh turin ka sawm che u a ni," a ti.

ZPM candidate Laltlanmawia pawhin thu sawiin, political platform-a ding ngai lo a nih thu a sawi a, "Vawiina ka rawn din chhuah ngawt chhan chu, kan ram hian dikna rinawmna a mamawh, chu chu kan tun din a ngai. Ka fel ber, ka ṭha ber ka ti lo, amaherawhchu, dik tak leh rinawm taka thil tih duh mi ka ni," a ti a; ram mipui tán hian entawn tlak hnutchhiah theih a inbeisei tlat thu a sawi.