Congress leh ZPM candidate thlan tlinin Bial tan hnemhnànna a awm dawn lo - Dr R Lalthangliana

MNF ṭhalaite chuan October 23, Inrinni khan Serkhan, Thingdawl leh Kawnpuiah street campaign an buatsaih a; thu sawitu Dr R Lalthangliana, MNF adviser chuan, Congress party leh ZPM party candidate-te thlan tlin a nih chuan bial tan hnemhnànna tur a awm dawn lo niin a sawi.

Dr R Lalthangliana chuan, Congress chu central leh state tinin an hnâwl hnu a nih thu sawiin, "Mizoramah pawh hman ni lawkah MLA 34 an neih aṭangin an artelukàwn lo chauh a ni. Mizorama sorkarna siam rei tawh ber an ni a, tun dinhmun hi min thlen chu a ni. Development engkimah an hlawhchham a, an hotute khan ram veina an nei lo. Congress hian han ṭhat thar thut chhan tur an nei lo," a ti.

ZPM chungchang sawiin MNF Adviser chuan, "A tirah movement anga kal tumin party-te'n kan inghahna bulṭhut unit leh block neih ṭul lo titu an ni. Tunah unit leh block dinin an hmanhlel a, an indin dan pawh hi a tir aṭangin dâwtin mipui min bum a ni. Kalphung thar an tih hi kalphung thar tak tak awm lo," a ti a; ZPM-in kalphung thar an tih ber nia lang chu Val Upa Council leh Zonu tih a nih thu a sawi.

Dr R Lalthangliana chuan, Tuirial bialah Congress leh ZPM candidate-te chu tling palh se, bial mipui tan hnemhnanna tur a awm lo ve ve nia sawiin, "Chuvangin, awmze nei thei tur MNF candidate hi lo titling ang che u," a ti.

MNF Ṭhalai president Lalrinawma chuan, Andrew H Thangliana hun lo taka a thi chu pawi an tih thu sawiin, "A hmachhawp hrang hrangte hlen a nih theihna turin MNYF chuan theihtawpin hma kan la zel dawn. Kan hma lawk October 30, 2021-ah in khua leh in bial hmasawnna tur chu in kutah a awm," a ti a; MNF candidate vote ngei turin Tuirial bial mipui a sáwm a ni.