Sum enkawl thiam loh vangin MNF sorkar A la tâlbuai tulh tulh dawn - Joseph Himpuia

Congress party chuan October 23, Inrinni khan Bualpui khuaah mi thar lawm luh inkhawm an buatsaih a, thusawitu MPCC general secretary Joseph Lalhimpuia chuan, MNF sorkar chu sum enkawl thiam loh avangin a la tâlbuai tulh tulh dawn tih a chian thu a sawi.

Joseph Lalhimpuia chuan, Mizoramin sum enkawltu ṭha a neih loh avangin CSS-a state matching share chu a hun takah MNF sorkarin an pe zel thei dawn lo tih a lan thu a sawi a, "Sum an enkawl thiam loh avangin an la tâlbuai tulh tulh dawn tih a chiang. Central sorkar sponsor scheme reng reng, PMGSY, NHM, Samagra, adt. pawh ni se, sum tihkhawtlaia K.deposit-a dah a theih tawh dawn loh, tunah sorkar hnathawk hlawh leh pension pawh an pe hlei thei lo a ni. MNF sorkar chunga rinna nghah zui zel hi mipui tan a harsa em em tawh," a ti.

Congress sorkar tàwp lamah RBI-a sum pûk ngai mang loin inenkawl theih a nih bakah hmasawnna hna thawh thei a nih thu sawiin MPCC GS chuan, "MNF kum thum lek sorkar chuan an han chên tak tak a, kan dah sa an hman zawh mai bakah, sorkar hnathawk hlawh leh mamawh chawp atana RBI hnena pûk an dil pawhin an pe ṭha ngam tawh lo," a ti a; a lipui ber central sorkar pawhin a rin ngam tawh loh chuan MNF tuikhur a kang chat dawn hnai tih a chian thu a sawi.

ZPM chungchang sawiin Joseph Lalhimpuia chuan, "ZPM hi unit leh block an neih hnuah a thu fâl deuhte duh dan a tlang ta zel. Tun ṭumah pawh campaigner an awm hlei theih loh hi. Tuirial bial ang tho hian Lunglei lamah pawh tu emaw ni chuan candidate tur amahin a sáwm kual chiam a, hruaitu dangte an ṭeu nasa khawp mai," a ti.