KHAWTHLIR

Fairelbêl aṭangin chhawmdawlna sem
Aizawla Covid-19 vanga harsatna tâwk leh chhawmdawl ngaite ṭanpuina tura din, Fairelbel Charity Programme kaltlangin October 22 tlai khan Aizawl DC conference hall-ah chhawmdawlna thawh hnihna Rs. 8,37,635 sem a ni. YMA branch 16 leh Fairelbel Organizing Committee-te hming thehluh aṭanga thlan chhungkaw 32 hnenah Rs. 10,000 leh chhungkaw 16 hnenah Rs. 5,000 ṭheuh, SWD kaltlanga thehluh chhungkaw pathum hnenah Rs. 10,000 ṭheuh, ZMC Poor Fund-ah Rs. 2,00,000 leh ZMC-a Covid-19 vanga thi inenkawlna senso (medical bill) pe thei lote rulhsak nan Rs. 2,37,635 pek a ni.

Certificate hlan
Lungleia Excise & Narcotic conference hall-ah October 22 khan Blue Eyes Academy, Lunglei hnuaia skill development training zote hnenah certificate hlanna buatsaih a ni a, Lunglei South bialtu MLA Dr K Pachhunga'n a hmanpui. Training zote hi chhang siam leh puanṭhui zir chhuak mi 55 an ni.

Minister-in tlawh
Agriculture minister C Lalrinsanga chuan October 23, Inrinni khan Buarpui rama Tlawng Phainuam zau leh an tui lakna Sabereka Khuangkaihin a tihchhiat a tlawh a; Sesih lui tui lakna Sabereka Khuangkaihin a tihchhiat chu a thar siam tum a nih thu leh solar pump hmangin a tam thei ang ber tui lak tum a nih thu a sawi.

Heroin man
Excise & Narcotics department (END) chuan nimin zing dar 7:30 khan Champhai Zote bul, Kawipuiah heroin gram 58.700 (hawng 5) leh a neitua puh Gawihsianvungi (39) w/o Khamzakhupa, Bulfek, Myanmar nia inchhal an man. END hian October 23, Inrinni chhun dar 12:40 khan Hunthar Vengah heroin gram 22 (hawng 2) leh a neitua puh Lalrindika (28) s/o B Laldinmawia, Champhai Bethel Veng nia inchhál an man a; October 22, 2021 tlai dar 4:30 khan END leh BSF-te ṭangrual chuan North Chhimluang, Kolasib district-ah heroin gram 808.600 (hawng 65) leh a neitua puh Ramneihthanga (47) s/o Lalthangvela (L), Vairengte Chhimveng nia inchhal an man bawk.