COVID-19 vei enkawl mek tam lamah Mizoram palina

October 22, Zirtawpni khan Mizoramah Covid-19 vei mi 745 hmuh chhuah a ni a, October 23, Inrinni khan mi 572 hmuh chhuah a ni bawk. Zirtawpni zan aṭanga nimin tlai dar 5 thleng khan hripui vangin mi 11 an thi. Mizoram chu India ramah Covid-19 vei enkawl mek tam lamah palina a ni mek.

Covid-19 vei Zirtawp­nia hmuhte chu ZMC labo­ratory-a hmuh chhuah 120, TrueNAT hmanga hmuh 29, RAT hmanga hmuh 590 leh FIA hmanga hmuh paruk an ni a; Inrinnia hmuh chhuahte chu ZMC-a hmuh 98, TrueNAT hmanga hmuh 37, RAT hmanga hmuh 427 leh FIA hmanga hmuh 10 an ni.

IDSP record angin, Mizoramah Covid-19 vei 1,17,261 hmuh chhuah a ni tawh a, mipa 57,231 leh hmeichhia 60,030 an ni. Nimin tlai dar 5 thleng khan mi 1,08,707 (92.71%) chhuahtir an ni tawh a, mi 411 (0.35%) thi tawhin, enkawl mek mi 8,143 (6.94%) an awm.

October 22, Zirtawpnia Covid-19 vei hmuh thar mi 745-te chu symptom nei 484 leh nei lo 261 an ni a; tualchhunga kái vek niin, an zingah hri kàina chin hriat loh 303 an awm. October 23, Inrinnia hripui vei hmuh thar mi 572-te chu symptom nei 324 leh nei lo 248 an ni a; tualchhunga kái vek niin, an zingah hri kàina chin hriat loh 284 an awm a ni.

Sorkar laipuiin nimin zing lama a tarlan danin, Mizoramah Covid-19 vei enkawl lai (active case) mi 8,943 an awm a, India rama state 28 leh union territory pariat zingah active case tamna ber palina a ni. Mizoram aia active case tamnate chu - Kerala-ah mi 81,155, Maharashtra-ah mi 27,634 leh Tamil Nadu-ah mi 13,280 an ni a; Karnataka-ah Mizorama active case zat chiah (8,943) an awm bawk.

Kumin October thla chhungin Mizoramah Covid-19 positive mi 22,431 hmuh chhuah a ni tawh a, chawhrualin ni tin mi 975.26 hmuh chhuah an awm ziah ang a ni a, a tlahniam hret hret zel. Kum 2011 chhiarpui aṭanga chhûtin, Mizorama Covid-19 vei hmuh tawh 1,17,261 chu mi 1,000 zelah hripui vei mi 107 an awm ang a ni a; mi 1,00,000 zela Covid-19 vangin mi 37 an thi tawh ang a ni.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Covid-19 positive hmuh tawh 1,17,261 zinga mi 1,15,613 chu civil mi an ni a; BSF mi 745, Assam Rifles-a mi 344, CRPF-a mi 122, BRO/BRTF-a mi 156, sipai (army) 64, NDRF-a mi 32 leh truck enkawltu mi 185 an awm. Mi 1,17,261 zinga mi 1,12,713 chu Mizoram chhunga kái chhâwng an ni a, mi 4,548 chu Mizoram páwn aṭanga an rawn luh hnua hmuh chhuah an ni.