Covid-19 vangin mi 411 an thi tawh

October 22, Zirtawpni tlai dar aṭanga nimin tlai dar 5 thleng khan Covid-19 vangin mi 11 an thi. Nimin tlai dar 5 thleng khan Mizoramah Covid-19 vangin mi 411 an thi tawh a, October thla kal mek bikah mi 101 thi tawhin, thi an tam ber thla a ni tawh.

October 22, Zirtawpni khan hripui vangin mi pakhat a thi a, October 23, Inrinniah mi pasarih an thi a, niminah tlai dar 5 thlengin mi pathum an thi leh bawk.

Zomuankimi (37), Ramhlun North chu October 22, Zirtawpni zan dar 11:45 khan State Referral Hospital (ZMC)-ah a thi a, natna dang nei tel a ni. Covid-19 vei a ni tih October 21-ah hmuh niin, SRH-ah dah luh nghal a ni.

Inrinni khan zing dar 1:45-ah C Thangzama (65), Champhai Bethel Veng chu Champhai DCHC-ah a thi a, hrpui vei a ni tih October 22-ah hriat a ni. Zing dar 7:10-ah Neihkimi (92), College Veng, Aizawl chu SRH-ZMC-ah a thi a, Covid-19 vei a ni tih October 7-ah hmuh niin, SRH-ah lak nghal a ni a; J Liankhuma (74), Kolasib pawh zing dar 7:35-ah SRH-ah a thi a, hripui vei a ni tih October 18-ah hmuh niin, October 20 aṭangin SRH-ah enkawl a ni.

Inrinni zing dar 8:40-ah Bulliana (72), Khumtung chu SRH-ah a thi a, Covid-19 positive a ni tih October 5-ah hmuh niin, October 9 aṭangin SRH-ah admit a ni. Zan dar 6:20-ah K Biakkima (51), Lunglei Electric Veng chu SRH-ah a thi a, hripui vei a ni tih October 13-ah hmuh niin, a tukah SRH-ah dah luh a ni. Zan dar 7-ah Zomawii (80), East Lungdar chu SRH-ah a thi a, hripui vei a ni tih October 9-ah hmuh niin, a tuk aṭangin SRH-ah enkawl a ni a; zan dar 11-ah Lalkairuma (66), Tuikual South chu SRH-ah a thi a, Covid-19 vei a ni tih October 11-ah finfiah niin, October 12 khan SRH-ah dah a ni.

October 23-a thite hi natna dang nei tel vek an ni tih sorkar thuchhuakin a tarlang.

Nimin zing dar 4:55 khan Rovulliana (63), Venghnuai chu SRH-ah a thi a, October 23 zan khan hripui vei a ni tih hmuh chhuah niin, a thih hma lawkin SRH-a dah luh a ni.

Zing dar 5:10-ah C Ropianga (88), Zemabawk chu SRH-ah a thi a, Covid-19 positive a ni tih October 23 khan hmuh niin, SRH-ah admit nghal a ni.

Rebecca Buangi (53), Kolasib pawh nimin zing dar 8:45 khan SRH-ah a thi a, hripui vei a ni tih September 19 khan hmuh a ni a, a tukah SRH-ah dah luh a ni. Nimina thite pawh hi natna dang nei tel vek an ni.