Thu dik lo hmanga pastor-te tihhminghliau Tum tawh loh turin MPCC-in CM an ngen

Mizoram Pradesh Congress Committee (MPCC) chuan thuchhuah siamin, thu dik lo hmanga pastor-te tihhminghliau tum tawh loh turin chief minister Zoramthanga an ngen.

MPCC chuan, MNF-in kum 60 tlin Vanapa Hall-a an lawmnaah CM Zoramthanga'n pastor-te'n zu zawrh an sawi mawi ṭhin niin a sawi tih an tarlang a, "Hetianga dâwt hmanga intihhminghliau tum hi Pathian kohhran rawngbawltu pastor-te leh kohhran diriamna leh zah lohna nasa takah kan ngai," an ti.

Ram leh hnam ṭhatna leh hmasawnna tak tak duh vang ni lo, lalna leh thuneihna chan tum vang ringawtin kohhran zahawmna tihminghliau zawngin political party ṭhenkhatin hmanrua atan kohhran an hmang duh nia sawiin MPCC chuan, "An beisei ang lalna leh thuneihna chan loh avanga chhuanlam atan kohhran rawngbawltu pastor-te zu zawrh sawi mawi ṭhin anga puh duh khawp Kristian state-in CM kan nei hi vanduaithlak kan ti tak meuh a ni," an ti a; CM thusawi chu pawi an tih thu an sawi.

Congress party chuan, tun hnaiah Mizoramah politics thianghlim leh ṭha zawk a awm theihna tura hma latu Mizoram People Forum (MPF)-in October 6, 2021-a Aizawl Press Club-a thuthar thehdarhtute an kawmnaah, politics-a chan ṭhat tum vanga kohhran an unit anga sawi ṭhin party an awm thu leh, chutianga sawi ṭhin nia an hriat party pisaah léngin, 'Kohhran hi in unit a ni lo' tiin chiang takin an hrilh thu an sawi niin an tarlang.

MPF-in thuthar thehdarhtute hmaah thuneihna beisei vanga kohhran zahawmna leh ropuina tihminghliau zawnga chê an awm thu an sawi a ngai chu pawi an tih thu sawiin MPCC chuan, "Chutiang a thlen hnua kohhran rawngbawltu pastor-te zu zawrh sawi mawi ṭhin anga CM meuhin a puh leh zel hi pawi kan ti hle. Tun hnuah kohhranin a khak ngai khawp leh Pathian rawngbawltute zahawmna tihminghliau zawnga che tawh lo turin political party-te leh CM kan ngen a ni," an ti.