Governor atan Kummanam Rajasekharan la lut ; Politics-ah ka inhnamhnawih dawn lo - Kummanam Rajasekharan

Mizoram governor 19-na atan nimin khan Kummanam Rajasekharan chu rinawmna thu tiamtira lak luh a ni. Kerela BJP president hlui Kummanam Rajase­kharan chuan, politics-ah inhnamhnawih a tum loh thu a sawi.

Kummanam Rajasekharan hi Gauhati High Court chief justice Ajit Singh chuan nimin chhun dar 11:30 vel khan Raj Bhavan Durbar Hall-ah rinawmna thu tiamtirin Mizoram Governor atan a la lut a; lak luhna inkhawmah hian chief minister Lal Thanhawla, minister te, MLA te, Chief Secretary, DGP, sorkar offical-te leh political party hruaitu eng emaw zat an tel.

Governor atana lak luh a nih hnuah Vanglaini palai zawhna chhangin Kummanam Rajasekharan chuan, Governor a nih tawh avangin politics-ah a inhnamhnawih dawn lo niin a sawi a, "Governor zahawmna ka hum ang. He nihnain a ken tel tih tur ang ṭha takin ka ti zel dawn a, politics khelhna atan ka hmang dawn lo. He mawhphurhna hi ṭha taka hlen ka tum a ni," a ti.

Kummanam Rajasekharan chuan, Governor a nihna anga hna a thawhnaah Mizo mipuite tan theihtawp chhuaha a thawh tur thu sawiin, "He state tihhmasawn hi ka thil tum tur a ni. Zirna, sumdawnna, agriculture leh thil dangah hmasawnna turin kan thawk ang," a ti a; Mizoram tan theihtawp chhuaha hna thawh a tum thu a sawi.

Larsap thar chuan, Mizo mipuite tan rawng a bâwl thei tur chu lawmawm a tih thu sawiin, "Mizoram Governor atan ruat ka ni hi ka lawm khawp mai. In Governor hlui Vakkom Purushothaman kha Kerela mi ve tho a ni a, Mizoram chanchin tam tak min hrilh a, chuvangin, in ram chan­chin ka hre thei a ni. Sor­karin ti tura min tih ang ka tihlawhtling thei ang," a ti.

Mizoram Governor a nihna anga a ngaih pawi­mawh ber tur zawhna chu Kum­manam Rajasekha-ran chuan, 'Engkima hmasawnna thlen' tiin a chháng.

Kummanam Rajase­kharan hi nimin chawhma dar 10:30 vel khan Lengpui Airport aṭangin Ṭhuampui Helipad-ah helicopter hmangin a ṭum a, helipad aṭangin Raj Bhavan a pan.

Kummanam Rajasekharan hi December 23, 1952-ah Kottayam district-a Kummanam-ah a piang a, CMS College Kottayam aṭangin B.Sc. (Botany) a zo a, a hnuah Postgraduate Diploma in Journalism a zo leh a ni. Chan­chinbu khawvelah hun eng emaw chen a awm hnuah Food Corporation of India-ah a thawk a, a hna bânsanin politics-ah a lut a, Governor atan ruat a nih thleng khan Kerela BJP president a ni.

Mizoram hian union territory a nih chhungin lieutenant governor panga a nei a, state a nih hnuah Kummanam Rajasekharan nen hian Governor 19 a nei tawh.

Mizoram Governor a neih tam ber kum chu kum 1998 a ni a, Governor ni lai PR Kyndiah chu January 13, 1998-ah a chhuak a, hemi kum vêk hian Governor dang pathum lak luh leh a ni.