Bru-te Mizoram páwna vote thlâktir lo turin Joint NGO-in Election Commission an ngen

NGO Coordination Committee (Joint NGO) hruaitute chuan nimin khan chief election commissioner (CEC) OP Rawat chu Election Commission of India (ECI) office, New Delhi-ah an hmu. Mizoram aṭanga Bru raltlante chungchanga an duh dante an thlen a; Bru-te chu Mizoram páwna vote thlaktir tum a nih chuan na taka an dodal tur thu an hrilh.

CEC OP Rawat hmutute hi Joint NGO chairman Vanlalruata, Central YMA president bakah, MHIP finance secretary Dr Thanpuii, MZP president L Ramdinliana Renthlei leh MSU president RB Lalmalsawma te an ni a; CEC hi election commissioner Sunil Arora leh official paliin an ṭawiawm a ni.

Joint NGO hian CEC hnenah memorandum an thehlut a, minute 20 chhung vel an inkâwm nghal. NGO hruaitute chuan, Bru raltlan, Tripura-a awm mekte chu kumina Mizoram Assembly inthlan turah tuna an awmna, Mizoram páwna vote thlaktir tum a nih chuan nasa taka an dodal tur thu an ECI an hrilh a; Mizoram páwna vote an thlak a nih chuan Mizo tan pawh thil zahthlak a nih dawn tawh thu an sawi.

Joint NGO hruaitute chuan, Mizoramin Bru raltlante chu a buaipui rei tawh dan te, Bru chung changah tun ṭum bak chu ECI dawr tura kal an tum tawh loh thu te, Bru hruaitute chu Bru mipui chhawmdawlna hmanga an hausak thu leh motor ṭha ṭha an neih thute an sawi a; kum 2014-a Lok Sabha inthlan dawnah Joint NGO leh ECI inremna, Mizoram páwna Bru-te vote thlaktir loh chu ECI-in a tihhlawhtlin ngei an beisei thu an sawi bawk.

CEC OP Rawat chuan, Bru raltlan hruaitute'n motor ṭha tak tak an nei a, an hausa lutuk chu mak a tih thu leh a barakhaih hle thu a sawi a; Joint NGO thu thlente chu an lo ngaihtuah tur thu a sawi a ni.

Joint NGO hian memorandum an thehluhah hian, Bru pawl ṭhen­khatin Mizoram chhuansan tura Bru mipui an hriattirna lehkha (pamphlet) leh document pawimawh hrang hrang an thil tel.

Joint NGO memorandum-a ziah lan Ṭhenkhat
1) Kum 1997-ah Bru misual ṭhenkhatin Dampa Wildlife Sanctuary-ah sorkar hnathawk Lalzawmliana an that a, chumi vanga buaina kal zelah Bru mipui eng emaw zatin an in leh lo leh khua chhuahsanin Tripura-ah an tlanchhia.
2) Ministry of Home Affairs, Mizoram sorkar leh NGO hrang hrangte hmalaknain Bru tlanchhiahte chu Mizoramah hruai kîr tum a ni a, mahse, chhungkaw 1,600 chuang hret chauh Mizoramah an let duh a, Mizorama lette chu thlamuang takin Mizoram chhungah an cheng mek.
3) Election Commission of India leh Mizoram sorkar hmalaknain Mizoram inthlanah Tripura camp-a khawsa mek Mizoram Bru-te chu an awmna hmunah vote thlaktir ṭhin an ni. Hetianga Mizoram páwna vote thlaktir hi Mizo mipuite'n an duh tawh lo.
4) Tripura-a camp-a awm lui tlat Bru-te chu Representation of the Peoples Act, 1950 Part-II Clause 19(b) tlawhchhanin Mizorama voter an nihna tihtawp theih a ni.
5) April 7, 2014-a Election Commission of India lehkha Letter No. 464/MIZ-HP/2014 (B&R) Dated 7th April, 2014 angin, hun lo la kal turah Mizoram mi Bru-te chu Lok Sabha leh Mizoram Legislative Assembly inthlana Mizoram pawna vote thlaktir loh tura tih a ni.