Tuirini lei chim chhan chhui zo

Sesawng leh Khaw­ruhlian inkara Tuirini lei chim chhan chhui tura din Magisterial Inquiry, Aizawl DC Dr A Muthamma kaihhruai chuan lei chim chhan an chhui zo a, sorkarah report an thehlut tawh.

Vanglaini palai zawhna chhangin Aizawl DC Dr A Muthamma chuan, Tuirini lei chim chhan an chhui zawh tawh thu a sawi a, "Hun tiam zawh hmain report kan thehlut thei a, May 23, 2018 khan kan report buatsaih chu sorkarah kan thehlut a ni," a ti.

Tuirini lei chim chhan chhui tur Magisterial Inquiry dinna order hi February 2018 tawp lamah tihchhuah a ni a, thla thum chhung hun pek niin, May thla tawp lam thleng hun an nei a ni.

Tuirini lei chim chung changah hian a technical thil zir chiang turin Aizawl DC chuan Indian Institute of Technology (IIT), Guwahati-a mi­thiamte a sáwm a, IIT mithiamte chuan Tuirini lei chu a hmunah tlawhin an zir chiang a, an report erawh an la peih lo thung.

Tarlan tawh angin, Turini lei dawh mek chu February 13, 2018-ah mi pahnihin an zawh laiin a chim a, mi pakhat a thi. Lei chim tlaia Home Minister hoa sorkar mi pawimawhte ṭhukhawm chuan, lei chim chhan dik tak chhui chhuak tura Aizawl DC kaihhruai Magiste­rial Inquiry din an rél a ni.