Rural Development Minister-in CM Housing Scheme hawng

Thingtlang mite tana in sak ṭanpuina tura ruahman, Chief Minister's Rural Housing Scheme chu nimin khan Rural Development department minister R Lalzirliana'n RD directorate conference hall-ah a hawng.

R Lalzirliana chuan, sorkarin mirethei­te chawikan leh chhawm­dawl a ngaih pawimawhna avangin thingtlang mite puala in sak ṭanpuina scheme duan a nih thu a sawi a, "Sorkarin mi harsa tak takte dinhmun a hriat chian avangin anmahni chhawmdawlna turin scheme tam tak kaltlangin ṭanpuina sumte sem ṭhin a ni. Chu chu sem policy tiin mi ṭhenkhat awm thei zawkte'n an sawi mai ṭhin a, mirethei zawkte dinhmun leh harsatzia an hre chiang lo hle a ni," a ti.

RD Minister chuan, CM Rural Housing Scheme hnuaia ṭanpuina sem theih zat, mi pakhatah Rs. 50,000 chu chenna in tlabal tawh neitute'n an in an thawm ṭhatna atan leh khawsak harsa zawk, in thar sak tum mekte tan pawh a ṭangkai hle dawn a ni tih a sawi a; scheme buaipuitu sorkar hnathawkte chu fimkhur taka thawk turin a chah.

CM Rural Housing Scheme hi NEDP hnuaia siam a ni a, ṭanpuina dawngtute thlang turin DC kaihhruaina hnuaia District Level Selection Committee a awm a, sum hman dan chu kum tin endik a ni dawn.

Scheme hnuaiah hian kum 2016-17 chhung khan Serchhip, Lawngtlai leh Siaha district-ah cheng nuai 600 sem a lo ni tawh a; kum 2017-18 atan cheng nuai 1,000 dah niin, Aizawl, Lunglei, Kolasib, Champhai leh Mamit district chhunga mi harsa zawkte in sak ṭanpuina pek a ni ang.