CS-in lockdown dan a sawifiah

State Level Task Force on Mitigation of Covid-19 chairman Lalnunmawia Chuaungo, chief secretary chuan March 22, Pathianni khan NIC video conferencing hall-ah thuthar thehdarhtute kâwmin, March 23-29, 2020 chhunga Mizoram lockdown a nih dan tur a sawifiah.

• Lockdown chhungin dâwr khâr vek tur a nih rualin, ni tin mamawh (essential commodity), mipuite'n an lei reng theihna turin ni tin mamawh zawrhna dawr erawh hawn phalsak a ni. Dawra thil lei turte chuan village/local task force chairman an hrilh ang a, anni'n ruahmanna an siam ang. Veng chhunga dawr inhawn dan chu local level task force ruahmanna siam anga kalpui tur a ni. MRP aia toa thil hralh khap a ni.

•  Dan leh thupek kengkawhtu te, fire & emergency service te, tui leh kawlphetha buaipuitu te, COVID-19 donaa hma latu sorkar hnathawk leh anmahni puibâwmtu te, bawnghnute sem leh media mite a huam lo.

•  Sorkar kum tawp (financial year) thla a nih avangin loh theih loha zawh ngei ngei ngai, time bound work hna tam tak a awm a, chu'ng hna khawihtu sorkar hnathawkte leh sorkar hna pawimawh dang khawihtute a huam lo.

•  Sorkara secretary, head of department leh head of office-te chu office an kal ang a, anni'n office-a kal ngei ngei ngai an tihte an thlang ang. Office kal lote chu in lamah a ṭul huna biak theih turin an awm reng tur a ni.

•  Bank zinga sorkar sum chevel khawihtute chu an inhawng a, a kal tur chin chu anmahniin an ruahman ang. Bank-te hi mipui tan dàwr theih an ni dawn lo a, ATM chu hawn reng tur a ni thung.

•  Damdawi zuarte inhawng tura tih an ni a, local level task force-te'n remruatna an siampui ang leh doctor thuràwn angin an hralh ngei tur a ni.

•  Thlawhtheihna service tihtawp a ni lo a, emergency thil atan a ṭangkai bakah Mizorama lo haw turte tan an service a la ngai. Thlawhtheihna aṭanga haw Aizawl mi ni lote chu an khuaah an haw tlang tur a ni a, haw tlangna tur an nei lo a nih chuan Lengpuia qurantine centre-ah ni 14 an awm tur a ni. Ram dang aṭanga rawn kal turte chu ṭhulh tura tih an ni.

•  Vairengte aṭangin essential commodity phurh luh phal a ni. ILP pek chhuah phal a ni tawh lo. State danga tangkhang laklawh Mizoram a rawn kîrte chu an khuaah an tlang nghal tur a ni a, an khuaa tlangna nei lote chu kalna an neih hma chu Vairengteah quarantine tur an ni a, haw tlangna an neih hunah chhuah an ni ang a, an nei lo a nih chuan ni 14 quarantine tur an ni.

•  Hostel/residential institution neitu leh enkawltute'n an khâr sorkarin rem a ti lo. Hostel-a zirlai, etc. him taka awm sa chhuah darhtir hi a him lo zawk a ni.

•  Lockdown vanga chhuanchham an awm chuan sorkar a tlanchhe lo ang.