KHAWTHLIR

Gas tihchingpen man
Central YMA Kumpuan duty-te chuan May 28, Thawhṭanni zan khan New Khamrangah Chhingi inti hnen aṭangin eirawngbawlna gas khawih chingpen bûr 15 an man a, Baby-i inti hnen aṭangin bûr 50 an man bawk. Mipuiin gas bûk tling an lak theih nan CYMA Kumpuan duty-te hian hma an la reng a, a khát tâwkin gas tihchingpen an vâi reng a ni.

MZU-ah workshop
Mizoram University-a Department of Public Administration chuan May 28, Thawhṭanni khan MZU-ah 'Right to Information in Right Time' tih thupui hmangin national workshop an buatsaih. Workshop-ah hian Odisha state information commissioner Sashiprava Bindhani chu khuallian a ni a, RTI Act chungchang a sawifiah.

Zirlai chawimawi
Kumin HSLC leh HSSLC result chhuaka Siaha district-a sikul hrang hranga hmeichhe naupang tiṭhate hnenah nimin khan Siaha DC conference hall-ah chawimawina hlan a ni a, bawrhsap Harleen Kaur-i'n a hmanpui. Chawimawina hun hi sorkar laipuiin hmeichhe naupangte tana scheme a kalpui mek, Beti Bachao Beti Padhao (BBBP) bultuma buatsaih a ni.

Tlân khap
Traffic SP chuan thupek chhuahin, June 1, 2018 aṭangin Laipuitlang, Thirhrui ban kâwn leh Laipuitlang Local Council House inkarah pipeline phûm hna an thawh a nih dawn avangin, hna thawh hun zing dar 9
aṭanga tlai dar 5 leh, zan dar 9 aṭanga a tûk zing dar 5 inkarah lirthei tlân khap a nih thu a puang.

CM-in tlangzarh
North Eastern Development Finance Corporation Ltd. (NEDFi) buatsaih lehkhabu pahnih, 'Comprehensive Study on Skill Development in the State of Mizoram' tih leh, 'Project Profiles for Micro and Small Enterprises for Mizoram' tih chu nimin khan chief minister Lal Thanhawla'n CMO conference hall-ah a tlangzarh.