Silai licence pek chhuah kan titawp - Chief Minister

State Level Committee on Green Mizoram leh Sub-Committee chu nimin khan chief minister Lal Thanhawla hoin CMO conference hall-ah an ṭhu a; Chief Minister chuan, Mizoram sorkarin silai licence pek chhuah a tihtawp thu a sawi.

Chief Minister chuan, nung­cha leh environment humhalh chu Mizoram sorkar ngaih pawimawh berte zinga mi a nih thu a sawi a, "Hmalakna pawimawh ber NLUP-ah pawh Mizoram thing leh mau humhalh leh ramngaw tihpun zelna tur kawng ruahman a ni. Mizoram sorkar chuan silai licence a pek ṭhin pawh titawpin, China lam aṭanga airgun lo lutte pawh khuahkhirh dan tur ngaihtuah mek a ni," a ti.

Tun dinhmunah Mizoram chu ‘green cover’ ringawtah chuan a sang ber pawl, 87% a ni mek tih sawiin CM Hawla chuan, "Ramngaw tak tak erawh 2% chauh a awm tawh. Kum tin lo hâl leh ram kângin Mizorama ram­ngaw eng emaw zat a tichereu zel hi a pawi tak zet a ni," a ti a; thing leh mau humhalh leh kângmei laka ven chu mi zawng zawng mawhphurhna a nih thu a sawi.

Lal Thanhawla chuan, Mizo­ram chu ramhmul damdawiah a hausa tih hriain, sorkar laipui bultumin Research Centre din tum a nih thu a sawi a, "Ramhmul damdawi chungchang zirna leh siam chhuahnaah Mizoram chu khawvelah a la lâr dawn chauh a ni," a ti.

Chief Minister sawi danin, kum 1998 aṭangin Green Mizoram Day hman a ni a, nikum thleng khan Mizoram pumah thing ṭiak nuai 37 chuang phun a ni tawh.

Principal chief conservator of forest Lalram Thanga chuan, Green Mizoram Day hman a nih aṭanga thing phun tawh zawng zawng zinga 66% chu a nung ṭhaa hriat a nih thu a sawi a, "Khawvel pumah June 5 hi World Environment Day-a hman ṭhin a nih angin, Mizoramah pawh kuminah hman leh tur a ni," a ti.

Meeting-ah hian kumina Green Mizoram Day hman dan tur relin, June 11, 2018-a hman turin an rel a; zing dar 7-ah Chite lui kam, Ramthar Veng-Ṭhuampui lei bulah hawn a ni ang.