Ṭha zawka buhfai sem dan tur sawiho

Food, Civil Supplies & Con­sumer Affairs (FCSCA) department chuan nimin khan Hotel Regency-ah ‘End to End Computerization of Targeted Public Distribution System (TPDS) Operation Scheme’ thlirletna an buatsaih a; Ministry of Consumer Affairs, Food & Public Distribution-a joint secretary Pramod Kumar Tiwari-a'n a hmanpui.

Meeting-ah hian public distri­bution system (PDS) a chak zawk nan Mizoramah buhfai quintal 10,50,000 chuang mamawh a nih avangin, thla tina tide over allocation qtl. 16,518.75 aṭangin 50,000 ni thei se tih a ni a; district pali - Siaha, Mamit, Serchhip leh Champhai-ahte food storage depot a awm loh vanga harsatna an neihte chu Joint Secretary hnenah thlen a ni.

Meeting-a tarlan danin, Mizo­ram sorkarin Aadhaar Seedling turin hma nasa takin a la a, May 28, 2018 thlengin Aadhaar Seedling percentage chu 79.73% a ni a, chu'ng zinga 57.57% chu National Food Security Act (NFSA) hnuaia beneficiary an ni.

April 25-26, 2018-a Khrishi Bhawan-a ruahmanna siam angin, Mizoramah May 2018 aṭanga e-PDS hman tum chu remchan lohna avangin tih theih a la ni lo a; e-PDS atan hian Pramod Kumar Tiwari chuan, state level-ah pakhat leh district level-ah pahnih chhawr tur mithiam awm se ṭha a tih thu a sawi.

PDS hi Mizo District Council a nih laia awm tawh a ni a, tun dinhmunah hian Mizoramah principal distribution centre 13 leh subsidiary distribution centre 19 leh supply centre 97 a awm.

NFSA hi Mizoramah March 1, 2016-ah hman ṭan a ni a, Mizoram sorkar chuan buhfai mimal tan kg. 5 dawn theih bakah, PHH beneficiary tan kg. 3 dang a pek belh a; NFSA-in a huam loh mi 5,95,628 hnenah thla khatah mi pakhat tan buhfai kg. 8 lak theih turin a ruahman a ni.