Chhim lam power supply pekna tur enfiah

Mizoram chhim lama kawlphetha pekna tur line thar, 132 KV line (alternative line) Melriat-Khawiva via Buarpui line siam hna thawh mek chu nimin khan Lunglei Power Circle hotute leh Lunglei district MJA-ten a hmunah an enfiah.

Power & Electricty executive engineer H Zoliana chuan, 132 KV line (alternative line) Melriat-Khawiva via Buarpui line chu Non-Lapsable Central Pool of Resources (NLCPR) hmanga ruahman a nih thu sawiin, "A hna pumpui approved cost chu cheng nuai 4176.07 a ni. Contractor Tantia-NMTPL (JV)-te chu Octo­ber 31, 2018-a thawk zo hman tura beisei a ni a, tun din­hmunah 87% zawh a ni tawh," a ti.

132 KV line-ah hian tower 242 awm tura ruamhan a ni a, ban phunna tur laih zâwl (benching) 230, ban khur 223, stub setting (concreting) 225, tower erection (ban zawm chhoh tur) 156 thawh zawh a ni tawh. Electric hrui zam tur km. 112.036-ah km. 60.447 zawh a ni tawh a, zam hmabak km. 51.563 a la awm.

Site inspection zawhah Lungleia IPRO office-ah inkawm­hona hun hman a ni a, hmalak zel dan tur leh hmachhawp hrang hrangte an sawiho. Lunglei district MJA chuan, 132KV line (alternative line) Melriat-Khawiva via Buarpui line siam mek chu chak zawka thawh a, zawh thuai a nih theihna turin kumina an inkhawmpuiah resolution an pass a; an resolution bawhzuina atan hna thawhna hmun an tlawh a ni.