Mizoram lottery distributor-te term a tâwp ; Tender hmangin distributor thlan a ni dawn

Mizoram sorkar chuan lottery kalpui chhunzawm zel turin distributor ngaite term a pawtsei dawn lo a, distributor tur zawnna atan tender vawiin hian chhuah hman a tum. Mizoram sorkarin lottery distributor atana a hman mek firm-te term chu May 28, 2018 khan a tâwp a ni.

Finance department aṭanga Vanglaini thu dawn danin, Mizoram sorkarin Mizoram State Lottery Committee (MSLC) chu distributor-te term pawhsei tur nge, tender a thara chhuah tur tihah thutlukna siam turin a hriattir a ni.

MSLC-ah hian Chief Secretary chu chairman a ni a, member secretary chu IFSL Director niin, member dangte chu Finance Secretary leh Law & Judicial Secretary-te an ni.

MSLC chuan, lottery distributor ni lai term chu pawtsei lo a, distributor tur zawnna atana tender chhuah an rêl a, chumi bawhzui chuan tender chhuah thuai tum a ni.

Tuna Mizoram sorkar hnuaia lottery buaipui mektute chu - online lottery-ah NV International, Summit Online Trade Solutions leh E-Cool Gaming Solutions an ni a; paper lottery-ah Testa Distributors a ni.

Firm palite hi Mizoram sorkar chuan lottery buaipui turin May 18, 2012 khan tender kaltlangin a thlang a; an term hi ṭum thum a pawhseisak tawh a, a pawhsei hnuhnun berah May 29, 2015 - May 28, 2018 chhung atan a pawhsei.

Mizoram sorkar hnuaia lottery distributor-te hian West Bengal, Maharastra, Punjab leh Sikkim-ah lottery an zuar chhuak mek a; Mizoram bikah chuan lottery ticket hralh a kal loh avangin kum 2012 aṭangin ticket zawrh chhuah a ni tawh lo.

Mizorama lottery distributor-te hi Kerela-ah pawh luh an tum a, mahse, Supreme Court-ah Kerela sorkar a kal avangin an lut thei rih lo. Supreme Court hian February 2018 tîr khan thutlukna siam a tum a, mahse, Kerela sorkar ukilte'n hun an dil belh avangin thutlukna siam hun sawn a ni.

MNF chuan Mizoram lottery distributor-te leh sorkar thuneitute chu inzawmna neia ngaiin, an term pawhsei sakna chu titawp turin Mizoram sorkar an lo phut tawh ṭhin a ni.