Lungawi loh lantirna atan bank khâr

United Forum of Bank Unions (UFBU) hmalaknain, nimin zing dar 6 aṭang khan India ram bank-a thawkte'n Indian Bank Association (IBA) leh sorkar laipui laka an lungawi lohna lantirna atan bank-te an khâr a, Mizorama bank-te pawhin zawmin, Mizorama bank hrang hrangte khâr a ni.

Lungawi lohna lan­tirna atan hian bank-te chu June 1, 2018 zing dar 8 thleng khâr a ni dawn. NCBE, Mizoram Fede­ration chuan thuchhuah siamin, an harsatna tawh leh an thil phutte hriat­thiamsak turin mipui an ngen a, "Min dâwrtu mipuite hian kan dinhmun min hriatthiamsak ngei kan beisei," an ti.

Bank-te lungawi loh chhan

An duh lohte:
1) Charter of Demand chinfelna kawnga IBA a muang lutuk
2) Bank hnathawkte leh officer-te pay revision chungchanga sorkar a inrawlh ṭha duh lo
3) Hlawh punna tura IBA-in 2% an rawt chu a tlem lutuk
4) Bank ṭhenkhatin pay revision-in a huam chin turah scale-III officer chin an lo remti nial nual (scale VI chin a huam tel chin a la ni reng)

An phûtte:
1) Hlawh punna tura inremna (wage revision settlement) chak tak leh rang taka chinfel
2) Hlawh leh service condition mawi leh awm tawka tihpun leh tihchangtlun
3) Hlawh punna tura inremnain officer scale VII thleng huamtir leh