KHAWTHLIR

Nimina chief secretary Lalnunmawia Chuaungo hoa CS conference hall-a ṭhukhawm chuan, March 22, Pathianni tlaia Guwahati aṭanga bus hmanga Mizoram pantu mi 57-te chu Vairengte khuaah dah hran (quarantine) ni se, an ti. Vairengteah hian quarantine centre hmunhmáin a daih loh chuan Kolasib district-a hmun dangah dah an ni ang. Lengpui Airport aṭanga khualzin lo thlengte chu uluk taka endik zel a ni dawn a, ram dang leh India ram chhunga Covid-19 hluarna hmun aṭanga lo lutte chu Lengpuiah dah an ni ang.

Covid-19 chungchang­ah social media hrang hrang­ah thu dik lo, belhchian dâwl lo leh mi tirálkhèl thei thil tam tak vawrh darh ṭhin a nih avangin sorkar laipui chuan fimkhur turin mi tin a chah a; thu dik loa rinhlelh vawrh darh an awm chuan Press Information Bureau (PIB) whatsapp no. 918799711259-ah emaw email ID pibfactcheck@gmail.com ah emaw hriattir tur a ni.

Lalrinsanga Ralte, MLA chuan nimin khan a bial Serlui constituency ­chhunga khaw tina local task force (task force 22) hnenah V/C kaltlangin Rs. 10,000 ṭheuh a pe. Lalrinsanga Ralte hian tun hnai khan mipui kut silna turin tuizem 18 a sem bakah, Vairengte screening post-a duty-te tan surgical gown 70 a pe tawh bawk.

Mara Autonomous District Council (MADC) Executive Committee nimina ṭhukhawm chuan, Covid-19 vanga an district-a ei leh bara harsatna tâwk an awm a nih chuan MADC-a thawktute'n thla khat hlawh aṭangin 3% thawh khawm ni se, an ti.