MIMER-a MBBS fee tur Rs. 98,250

Health & Family Welfare department chuan Mizoram Institute of Medical Education & Research (MIMER)-a MBBS zir man (fee) tur bithliah fel a nih thu a tarlang. Academic year 2018-19 atana MIMER-a MBBS zir man chu a tam berah Rs. 98,250 a ni dawn.

MIMER-a MBBS fee chungchangah hian Health secretary Lalrinliana Fanai chuan tun hnai khan notification a tichhuak. Notification-a a lan danin, MBBS fee hi hlâwm pali-ah ṭhen a ni a, hlawm palite chu hlâwm dangah ṭhen leh a ni.

MIMER-a MBBS fee hi course pumpui fee Rs. 10,000, security deposit chi li-ah Rs. 20,000 (refund leh theih), kum khat (per annum) atan fee Rs. 50,550 a ni a; belhkhawmin Rs. 80,550 a ni. Hostel-a awm tan fee Rs. 17,700 chawi belh a ngai dawn a, hostel fee nen a vaiin Rs. 98,250 a ni.