Jt. NGO-in Bru chungchangah MHA an dâwr

New Delhi-a chám mek NGO Coordination Committee (Joint NGO) hruaitute chuan nimin khan Ministry of Home Affairs (MHA) joint secretary Satyendra Garg chu a pisaah an kâwm a; Mizoram aṭanga Bru raltlan, Tripura refugee camp-a awm mekte chungchang an sawipui.

Joint NGO hruaitute chuan, Bru chungchang an buaipui rei tawh thu sawiin, "Kum 20 lai kan buaipui tawh a, Mizorama lo lut duhte chu lo lut se dodalna kan nei lo. Tuna Mizorama lo lutte hian Mizoram nuam an ti hle a, zalen takin an awm a, Mizote pawhin en hranna kan nei lo. Tripura-a Bru camp-a an hruaitute an hausak viau laiin, an mipuite erawh chu an rethei zel a ni," an ti.

Bru raltlante Mizorama hruai kîr tumin vawi tam tak ruahmanna siam a nih tawh thu sawiin Joint NGO hruaitute chuan, "Mizo society hian an lo lut duh lo a nih chuan Mizoram state páwn aṭanga vote an thlak kan pawm thei tawh dawn lo," an ti a; kumina Assembly inthlanpui hma ngeia refugee camp-a Bru-te chungchang chu chingfel turin MHA Joint Secretary an ngen a ni.

Joint NGO hruaitute chuan, Bru chungchangah MHA dawr tura kal an tum tawh loh thu leh Mizoram páwn aṭanga Bru-te vote thlaktir tum a nih chuan Mizo mipuiin nasa taka an dodal tur thu an sawi bawk.

Satyendra Garg chuan, Joint NGO-te thu thlen chu MLA inthlan hma ngeia lo tihfel hman an tum thu leh a ṭul anga hmalakzui a tum thu a sawi.

MHA Joint Secretary kawmnaah hian Joint NGO chairman leh Central YMA president Vanlalruata, MHIP finance secretary Dr Thanpuii, MZP president L Ramdinliana Renthlei leh MSU president RB Lalmalsawma te an kal a ni.