Kut hnathawktute chawikanna lam hawi Chhunzawm zel a ni ang - CM Hawla

Nimin khan Serchhip Town Hall-ah NLUP Fair-cum- Exhibition buatsaih a ni a, chief minister Lal Thanhawla'n a hawng. CM Hawla chuan, kut hnathawktute chawikanna tur lam hawi leh mil zawnga hmalaknate chhunzawm zel a nih tur thu a sawi.

Chief Minister chuan, a ma­mawhtute hnenah sorkar ṭanpuina sem a nih thu sawiin, "Mi vanduai fál tlem tê tih lohah chuan a dawngtute zingah mi taima leh rinawm, ṭhahnemngai taka thawktu chuan NLUP an hlawhtlinpui zel. Kut hnathawktute, rambuai vanga eizawnna mumal nei loa hun rei tak an awm hnuah leirem an rah leh theihna turin NLUP duan a ni," a ti.

NLUP chu a tìr aṭangin sorkar hnathawk leh sumdawng hausate tan ni loin, mirethei, khawsak harsa, pachhia leh hmeithaite

ṭanpuina leh leirem an rah theihna tur atana ruahman a nih thu a sawiin CM Hawla chuan, "Kut hnathawktute chawikanna tur lam hawi leh mil zawng hmalaknate chhunzawm zel a ni ang," a ti a; NLUP kalpui a nih aṭanga kum 7/8 hnuah Mizoram chu state ṭhang ṭha pali zingah a tel thu a sawi.

Lal Thanhawla chuan, Mizo­ramin hma a sawn thu sawiin, "State hmasawna kan awm theihna chu ram mipui, kut hnathawktute leh sorkar hnathawkte ṭan lakna vang a ni. Hun lo kal zel turah tun aia hlawhtlinna nasa zawk kan neih kan duh a, chumi atan chuan theihtawp kan chhuah zel dawn," a ti a; ram hmasawnna atan neitu rilru pu chunga sorkar hmalakna ṭawiawm zel turin mipui a sáwm.

Khualzahawm, minister Vanlal­awmpuii Chawngthu pawhin thu sawiin, kut hnathawktute chu ram hmasawnna atan an pawimawh thu a sawi a, "Sorkar pawhin kawng hrang hrangin an hmakhua a ngaihtuah ṭhin. Sorkar hmalakna hrang hrangte hlawhtlinna chu a thawktute mai bakah, a ṭawiawmtu mipuiah thui tak a innghat a ni," a ti.

Inkhawmah hian Cm chuan pian­phunga rualbanlo, Zosangliani, Then­zawl chu kumina HSLC exam-a a pass lawmpuina atan leh an chhungkaw inchâwmna atan CM's Special Scheme aṭangin auto-rickshaw a pe.

NLUP Fair-cum-Exhibition hian ni hnih a awh dawn a, line department hrang hrangte'n stall hawngin, NLUP dawngtute chuan an thil thar leh an thil siam chhuahte man tláwm zawkin an hralh chhuak a ni.