Adhoc aided-a dah turin sorkar ngen

Mizoram Govt. Lump­­sum Grant-in-Aid Higher Secondary School Association (MIGLAHSSA) chuan, May 28, 2018 khan joint meeting an nei a; lumpsum school-te adhoc aided-a hlángkai tura sorkar an ngennain awmzia a neih loh chuan June 7, 2018-ah Demand Day (no teaching day) hman an rel.

MIGLAHSSA chuan, khawtlang enkawl higher secondary school (HSS)-te chu kum 2004 leh a hma lama din tawhte an ni tih tarlangin, "Vawi tam tak thuneitute kan dawr hnu pawhin tun thlengin kan beisei ang engmah kan la hmu lo. Kum 14 lai khawtlangin hah taka a enkawl tawhte hi kan sorkar chak tak hian kumin 2018 MLA Election hma ngeiin adhoc aided status-a min hlang­kai turin kan ngen a ni," an ti.

MIGLAHSSA-ah hian khawtlang enkawl bik HSS pakua a awm a, chungte chu - Phullen HSS, Thingsulthliah HSS, Tuisualral HSS, Zobawk HSS, Farkawn HSS, NE Khawdungsei HSS, East Lungdar HSS, West Phaileng HSS leh Zawlnuam HSS-te a ni.