KHAWTHLIR

Tui tlem dawn
PHE department chuan thuchhuah siamin, June 1-3, 2018 chhungin filter house channel hlui leh thar thlakthleng leh power sub-station-a VCB siam hna an thawh dawn thu an tarlang a, "Phase-I hmangin hemi chhung hian tui a pump theih dawn lo a, ni dang aiin tui pump chhuah a tlem dawn a, kan tui neih sate renchem deuh turin mipuite kan ngen a ni," an ti a; mipui hriatthiamna an dil nghal bawk.

GPF a pung
Sorkar laipuia Ministry of Finance (Department of Economic Affairs - Budget Division)-in General Provident Fund(GPF) punna rate a siam angin, Mizoram sorkar chuan sorkar hnathawkte GPF a kalpui ve dawn. Sorkar thuchhuah tarlan danin, GPF-a sum dah luhte tihpun dan tur chu - October 1 - December 31, 2017 chhunga GPF punna rate 7.8% leh, January 1, 2018 aṭanga order thar a chhuah leh hma zawng atan 7.6% a ni.

Hnathawh thlir let
Nimin khan Siaha District Industries Centre hall-ah health worker-te hnathawh thlir letna hun hman a ni a, Siaha chief medical officer Dr Lalnunpari'n a hmanpui. He hunah hian health worker-te chu an mawhphurhna leh an hna atana pawimawh hrang hrangte zirtir an ni.

Zirlai chawimawi
Zawlnuam MZP chuan nimin khan an khuaa HSLC pass thar mi 51 leh HSSLC pass thar mi 35-te chawimawina hun, Bawrai community hall-ah an buatsaih a; an hun hmanpuitu, bialtu MLA Lalrinmawia Ralte chuan nu leh pa chawimawitu ni zel turin zirlaite a chah.

Rate tisang
State Transport Authority (STA) chuan Aizawla two wheeler taxi chuan man a tisang. Two wheeler taxi rate thar hriattirna hi May 22, 2018 khan STA Secretary-in notification siamin a tichhuak a; rate thar ang chuan, chuan ṭanna aṭanga km. khat chinah Rs. 20 a ni ang a, km. khat aia thuiah chuan km. khatah Rs. 10 belh zel tur a ni.