Health Minister leh chanchinbumite'n MIMER din tura hmalaknate an enfiah

Health minister Lal Thanzara leh Mizoram Journalist Association (MJA) member-te chuan May 29, Thawhlehni khan State Referral Hospital, Falkawn behchhana din tur, Mizoram Institute of Medical Education & Research (MIMER) an tlawh a, medical college din tura hmalakna hrang hrang an en.

Lal Thanzara chuan, medical college din turin May 25, 2018-ah sorkar laipuia Ministry of Health & Family Welfare-in phalna, Letter of Permission (LoP) a tihchhuah thu a sawi a, "Academic year 2018-19 aṭang hian MIMER-ah MBBS seat 100 awm tura ruahman a ni a, 15% chu Central Pool aṭanga hnawhkhah tur niin, 15% dang chu non-resident Indian (NRI) tana hauh a ni dawn a, a bak 70% chu Mizoram tan a ni ang," a ti.

MIMER hotute tarlan danin, medical college din tumin Mizoram sorkarin kum 2008 aṭangin hma a la ṭan a; State Referral Hospital-a khum 50 awm ṭhin chu December 10, 2012-ah khum 150-ah tihpun a ni a, DPR pawh April 2013-ah sorkar laipuiah thehluh a ni. Mahse, DPR chu hnâwl a ni a, DPR thar siam leh chu January 17, 2014-ah thehluh leh a ni. February 12, 2016-ah khum 300 awmna turin tihchangtlun leh a ni.

February 2014-ah centrally sponsored scheme (CSS) thar, Establishment of New Medical Colleges attached with existing District/Referral Hospitals siama damdawi-in tihchangtlun tur 58 zingah State Referral Hospital a tel a, chuta tan chuan sorkar laipui leh Mizoram sorkarin May 16, 2014-ah MoU an ziak.

He scheme hnuaiah hian State Referral Hospital tihchangtlun nan cheng vbc. 189 hmuh a ni a; cheng vbc. 189 funding pattern chu 90:10 niin, Central-in a tum tur vbc. 170.1 aṭangin vbc. 127.2 hmuh a ni tawh a, Mizoram sorkarin a tum tur vbc. 18.9 aṭangin vbc. 14.12 hmuh a ni tawh bawk.

Chronology of MIMER
4 Mizoram sorkarin kum 2008-ah hma a la ṭan.
State Referral Hospital-a khum 50 awm ṭhin chu December 10, 2012-ah khum 150-ah tihpun a ni.
4 April 2013-ah sorkar laipuiah DPR thehluh a ni a, hnâwl a ni.
4 June 9, 2013-ah a hming atan Mizoram Institute of Medical Education & Research tih pawm a ni.
4 January 17, 2014-ah DPR thar thehluh leh a ni.
4 February 12, 2016-ah khum 300 awmna turin tihlen a ni.
4 Establishment of New Medical Colleges attached with existing District/Referral Hospitals hnuaiah Central leh state sorkarin May 16, 2014-ah MoU an ziak. Scheme hnuaiah State Referral Hospital tihchangtlun nan cheng vbc. 189 hmuh a ni.
4 June 25, 2015-ah consultancy agency atan HSCC India rawih a ni.
4 A vawi khat nan kum 2014-ah medical college, MBBS seat 50 awmna tur din dilna MCI-ah thehluh a ni a, hnâwl a ni.
4 MBBS seat 100 awmna turin kum 2015-ah dilna thehluh leh a ni a, hnâwl leh a ni.
4 A vawi thum nan July 5, 2016-ah dilna thehluh leh a ni a, MCI-in January 5-6, 2017-a an endik hnuah an pawm lo.
4 A vawi li nan July 5, 2017-ah dilna thehluh leh a ni.
4 MIMER director turin October 27, 2017-ah Dr Lallukhum Fimate appointment pek a ni.
4 MCI-in November 21-22, 2017 chhungin an endik.
4 December 21, 2017-ah post thar siam 409 hnawhkhah phalna hmuh a ni.
4 MPSC leh HFW hotute'n February 27-28, 2018-ah Guwahati-ah interview an nei; faculty tur eng emaw zat lak a ni.
4 MCI-in April 4, 2018-ah an endik nawn.
4 MCI-in May 3, 2018-ah MIMER din a remti.
4 MCI-in May 15, 2018-ah Ministry of Health & Family Welfare-ah recommendation a thawn.
4 Ministry of HFW-in May 25, 2018-ah medical college hawn phalna LoP a pe.
4 Tun dinhmunah faculty (professor, associate professor, assistant professor, demonstrator) leh residents (senior resident, junior resident) mi 74 lak a ni tawh.
4 Faculty tura lak, appointment pek tawh zinga paliin an zawm lo a, zawm hnua báng leh mi pakhat a awm.
4 Junior resident atana lak zingah hna zawm hnua báng leh mi 4 an awm. Resident post 27 awmah mi mi 17-in hna an zawm, a bâk zawngin an hnâwl (decline)