Aizawlah All Mask Campaign neih a ni

Aizawl DC Dr Lalhriatzuali Ralte chuan, nimin khan Aizawl district tan All Mask Campaign a hawng. Hawnna hun hman zawhah Treasury Square khawlaiah aurinna hmangin mipui zirtirna kalpui a ni.

Dr Lalhriatzuali Ralte chuan, hmai tuamna vuah ṭhat chu invènna hautak lo ber a nih thu a sawi a, "Sorkar thuchhuah awih hi kan damna leh himna tur a ni tih kan hriat thar leh a ngai. Covid-19-in Mizoram a nuai tirh aṭangin mi tin kan buai a, sorkar pawhin theihtawp chhuahin SOP hrang hrang a tichhuak a, mipui, LTF/VTF-te'n sorkar an thláwp ṭha em em a ni," a ti.

Aizawl district-ah task force member pathumin Covid-19 vanga nunna an chán chu a tawrhpui thu sawiin Lalhriatzuali chuan, "Covid-19 hripui lên lai hian zir chhuah tur - thuawihna, ṭanrualna leh thawhhona pawimawhzia leh ṭanrual hi chakna a ni tih kan hriat nawn a ngai," a ti a; rilru thar púa rahbi thar intuk leh turin Aizawl district mipui a sáwm.

Hawnna inkhawmah hian Aizawl City Local Council Association, Joint NGO leh Mizoram Kohhran Hruaitute Committee member mi 12 hnenah chawimawina leh thilpek an hlàn a ni.

All Mask Campaign atan hian Home, Excise & Narcotics, Health leh IPR department-te'n Flying Squad team an din a, hmun lûn laiah hmai tuamna vuah pawimawhna leh vuah ṭha tura inzirtirna an kalpui dawn.

Campaign pualin Aizawl district-a BDP-te chu an bial chhunga hmai tuamna hmang uar tura ngenna leh hriattirna thawn chhuak tur leh veng hrang hrang LTF/VTF-te chu aurinna hmanga mipui zirtirna an kalpui tura tih an ni a; IPR leh CMO hmalaknain street preaching programme neih a ni dawn bawk.