SEDP-in nakkumah kut hnathawktute hnen a thleng dawn - Lalruatkima

MNF adviser Lalruatkima chuan nimin khan Mualkhanga vantlang inkhawmah thu sawiin, SEDP-in nakkum aṭangin kut hnathawktute hnen a thleng dawn niin a sawi.

Minister Lalruatkima chuan, Zoram­thanga kaihhruai sorkar chu an manifesto an tihhlawhtlin leh tihhlawhtlin lohah teh turin mipui a chah a, "SEDP-in nakkum aṭangin kut hnathawktute hnen a thleng dawn. MNF sorkar chuan a intiamna a tihlawhtling tam tawh hle a, a la tihhlawhtlin lohte pawh tihlawhtling turin hma lam a pan zel a ni," a ti.

Hripui léng karah MNF sorkarin manifesto a tihlawhtling a tam tawh hle nia sawiin Lalruatkima chuan, "Congress zu zawrh vanga Zoram rûmna titawp turin zu zawrh kan titawp nghal. Lirthei neite manganna lifetime vehicle tax siam danglam nghal a ni. Sikul kal dan thlak danglam nghal a ni bawk. Eirûkna do nan Lokayukta hna thawk theia siam a ni tawh a, Zoram dung tluana kawng chhe em em pawh tunah chuan a ziaawm ta hle a ni," a ti.

MNF Adviser chuan, zirtirtu indaih lohna nasa lutuk phuhrûk nan zirtirtu lak belh a nih thu leh eirawngbawlna gas leh buhfaia harsatna awm ṭhin chu a tàwp tawh thu a sawi a, "Congress sorkar laiin Zophaiah zirlai leh media mite'n Assam police lakah kut nasa takin an tuar a, chhantu an nei lo. Tunah chuan ramri humhim turin sorkarin huaisen takin hma a la ta mek zel a, ramriah hmasawnna hna thawh mek zel a ni," a ti bawk.