MNF thutiam chu mipui bumna a ni; ZPM-ah beisei tur a awm lo - MPCC

Mizoram Pradesh Congress Committee-a Media department hruaitute chuan nimin khan Aizawl Press Club-ah thuthar thehdarhtute an kâwm a; MNF thutiam reng reng chu mipui bumna a nih zel thu sawiin, "ZPM-ah pawh kalphung thar beisei tur a awm lo," an ti.

MPCC Media chairman Dr Lallianchhunga chuan, MNF-in inthlan dawnah thutiam hrang hrang, a hnua ngaihven zui loh an ngah tawh hle tih sawiin, "Tun hnai inthlan hrang hrangah pawh an thutiam, a taka chang leh si lo hmuh tur tam tak a awm. Inthlan dawna MNF thutiam reng reng chu mipui bumna a ni zel," a ti a; MNF thutiam chu rin loh tawp tur a ni tih mipuiin an hriat a ṭul thu a sawi.

Dr Lallianchhunga chuan, LC leh VC inthlan dawn, October 25, 2020-ah Sports minister Robert Romawia'n Bethlehem Vengah gym pek, Venghluiah badminton court leh indoor stadium siamṭhat, Durtlang leh Republic Vengthlangah futsal stadium leh Tuidam leh Kawrthahah phûl lem phah a tiam tih a sawi a, "Kum a vei hnuah pawh tun thlengin hmalakna mumal a la awm lo," a ti.

Republic Vengthlang, Pitarte tlanga volleyball indoor stadium sakna tur lungphûm pawh kum khat dawn a liam hnuah hmalak zuina hmuh tur a la awm lo tih sawiin Lallianchhunga chuan, Robert Romawia thutiam chu Zoramthanga thutiam ang chauha rintlak loh a ni tih hre turin Tuirial bial leh Mizoram mipui a chah.

ZPM chungchang sawiin MPCC Media Chairman chuan, "ZPM hian MLA pakhat leh anmahni thlawptu MLA panga an nei mek. Heng MLA-te'n an bial an enkawl danah kalphung thar hmuh tur a awm lo," a ti.

Dr Lallianchhunga chuan, Tuirial bial mipuite chu a taka ZPM hre chiangtu an nih thu sawiin, "Beidawngin ZPM an chhuahsan nasa hle. Tun hnaiah ringawt pawh Tuirial biala ZPM block, group leh unit hruaitu mi 40 chuangin ZPM an bànsan tawh a ni," a ti a; a taka enchhin tawhtute'n an bànsan nasat danah ZPM-ah beisei tur a awm lo tih a chiang niin a sawi.

MPCC Media hruaitute chuan, Tuirial bial inthlan turah CM-in mipui vauin, ruling party an thlan loh chuan an inchhir tur thu a sawi tih an sawi a, "Tuirial biala sorkar hnathawkte chu MNF candidate vote tura vau an ni tih kan hria. Hei hi democracy kalphung leh India dan kalh a nih avangin pawmzam theihah kan ngai lo a, ngun takin kan chhui dawn," an ti.

Zawhna chhangin Dr Lallianchhunga chuan, Congress party-in insiamṭhat hna an kalpui mekah hruaitu thlak an nih dawn leh dawn loah thutlukna siam a la nih loh thu a sawi a, "Hruaitu ni mekte rilru dam thlapin hruaitu inthlak kalpui a ni dawn," tiin, Pathian ráwn chungin an hotute'n hruaitu thlak chu an ngaihtuah tur thu a sawi.

Congress party chu mi ṭha thlan khawm an ni lo tih sawiin MPCC chuan, "Mi tling lo tê tê awm khawm kan ni a, tihsual palh pawh kan ngah ang. Ngaihdam dil chungin, insiamṭhat tumin nasa takin hma kan la mek a ni," an ti a, sorkar ṭha, sorkar puitling tak siam an tum thu an tarlang.

MPCC Media chuan, Tuirial bial mipui pawhin Congress party-in sorkar ṭha tak an siam theih an rin thu sawiin, "Beiseina sang tak nen min thlir mek a ni tih kan hria. Beiseina thar nena hma lam pan puiah Tuirial bial mipui kan sáwm," an ti a; INC candidate Chalrosanga Ralte vote ṭheuh turin an ngen a ni.

MPCC-in an tarlan ṭhenkhat
1) MNF-in kum 2018 inthlan dawna chhungkaw tin hnena SEDP Rs. 3,00,000 sem an tiam chu kum thum dáwn a liam hnuah pawh a tak hmuh tur a la awm lo.
2) Traffic jam awm lohna khawpuia Aizawl siam an tum pawh hmalakna a taka hmuh tur a la awm lo.
3) Field chhâwng hmuh tur a la awm lo.
4) Mizo buh hlîr kan ei ang an tih pawh a thu mai a la ni.