Kan candidate hi candidate atana Party-te sàwm rawn a ni - ZPM President

ZPM president Lal­liansawta chuan nimin khan Tuirial bial MLA by-election neih turah khaw hrang hrang a tlawh a; ZPM candidate chu mi ṭha tak a nih avangin party dangte pawhin candidate atana an sàwm rawn a nih thu a sawi.

Lalliansawta chuan, "Kan candidate hi mi ṭha tak a nih avangin party dangte'n candidate atan an sàwm rawn a ni a, politics a dài hma pawha a neih rosum hmanga luang chhuak ṭhin a ni. Nu leh pa aṭanga mi ngíl, khawtlang tana inpe a ni," tiin, Tuirial bial mipuite chu Laltlanmawia thlang tling ngei turin a ngen.

ZPM chu kut hna­thawktute tan innghahna tlak a nih thu sawiin Lal­liansawta chuan, "Kal­phung thar nena kal tur kan ni. Kalphung thar tih hian thil danglam teh vak a ni lo, kan tih dan apiangah kalphung thar lantirin, kan tih dan a danglam dawn a ni tih ka tiam che u a ni. Mi rilru a tuihâl em em a, party pahnih inlal chhâwk ringawt hian kan tuihâlna a tireh tawh lo. Rilru i siam thar sauh sauh ang u," a ti.

Thu sawitu dang, ZPM vice president Dr Kenneth Chawngliana pawhin thu sawiin, "Zoram mipui en rawn ber chu ZPM hi a ni," a ti a; ZPM sorkar hunah Mizoram chu state hmasawn berah hlàn kai an tum tih a sawi.

Vanlalhlana, MLA pawhin thu sawiin, ZPM thlí a tleh mek niin a sawi a, "Mipuite'n min beisei angin bung thar kan kàipui a ngai tawh. Pathian hian ZPM hi ram roreltu atan a duh a ni ang, ZPM hmasawn dan hi Pathian hnathawh tih loh rual a ni lo. Kan candidate hi party dang zawng zawng sàwmna hnâwltu a ni a, a tlin ngei theih nan theihtawp i chhuah ang u,” a ti.