KHAWTHLIR

Thisen pe
Mizoram Christian College NSS chuan nimin khan an hmunah thisen pek an huaihawt a, Civil Hospital, Aizawl tan thisen unit 57 an pe a, petute mipa 46 leh hmeichhia 11 an ni.

CMRF-ah thawh
Federation of Mizoram Government Employees & Workers (FMGEW) chuan nimin khan CM Relief Fund for Covid-19 ah Rs. 11,69,600 an thawh. FMGEW hian June 17, 2021 khan an ni khat hlawh an thawh khawm Rs. 3,00,00,000 te, July 26 khan Rs. 2,00,00,000 leh August 26 khan Rs. 70,61,600 an thawh tawh bawk. CMRF for Covid-19-a sum lut tawh zat chu Rs. 31,34,87,544 a ni a, Rs. 29,70,30,470 hman tawh niin, hman loh Rs. 1,64,57,074 a la awm.

PM-ASBY hawng
Prime minister Narendra Modi chuan nimin khan India rama health infrastructure tihchangtlunna tur Pradhan Mantri Atmanirbhar Swasth Bharat Yojana (PM-ASBY) a hawng a, hemi rual hian Hnahthial bawrhsap R Lalremsanga hoin Hnahthial Hospital-ah PM-ASBY hawnna hun hman a ni.

Pipe phûm dawn
Tuikhuahtlanga EFCC pisa aṭanga Bazar Bungkawn inkar kawngpuiah SIPMIU-in October 27, Nilaini aṭangin zan tin dar 9 aṭanga zing dar 5 inkarah pipe lian an phûm dawn a, hei vang hian kawngpui hi a chanve khâr ṭhin a ni dawn tih Aizawl Traffic SP Rodingliana Chawngthu chuan a puang. Hna thawhna huam chhung kawngpui sirah lirthei leh bungrua dah phal a ni lo.

Deworming Day
Kolasib District Coordination Committee on National Deworming Day chuan nimin khan chief medical officer Dr Lalhlimpuia pisaah kumina National Deworming Day (NDD) thawh hnihna an hawng. NDD thawh hnihnaah hian accredited social health activist (ASHA) 87 kaltlangin Kolasib district-a naupang kum 1-19 inkar 33,086 hnenah rúlhût hlo pek tum a ni.