India Skills 2021-ah Mizo an che ṭha

Them thiamna hmanga intihsiakna, India Skills 2021 Regional Skills Competition chu Bihar khawpui Patna-ah neih a ni a, Mizoram aiawha telte'n gold medal pathum leh silver medal paruk an la.

India Skills 2021 Regional Skills Competition-ah hian Labour, Employment, Skill Development & Entrepreneurship department tirhin Mizoram aṭangin mi 15 an tel a, trade hrang hrang 11-ah telin, trade pakua aṭangin national level-a intihsiaknaa tel turin an tling.

National Skills Competition chu December 2021-ah Bangalore khawpuiah neih a ni dawn a, chuta tlingte chu Shanghai, China-ah khawvel huap intihsiaknaah an tel leh thei dawn a ni.